وتكەن تۇندە الماتىنىڭ ناۋرىزباي اۋدانىندا سەل ءجۇرىپ، ءبىرقاتار ەلدى مەكەندەردە ۇيلەردى تاسقىن سۋ باسقان. بۇل تۋرالى "قامشى" پورتالى حابارلايدى.
"الماتىنى سەل الدى" بولىپ تاراعان بۇل حاباردى ەستىگەن جۇرت ۇيلەرىن تاستاپ شىعۋعا ءماجبۇر بولدى. 31 ارنا ءتىلشىسى يرينا سوۆەتجان ءوزىنىڭ فەيسبۋكتەگى پاراقشاسىندا سەل بولعان اۋماق تۋرالى بەينەجازبالاردى ءبولىستى. بەينەجازبادان بىلگەنىمىزدەي كەيبىر كوشەلەردى سەلمەن اعىپ كەلگەن ۇلكەن تاستار الىپ قالعان. مۇنداي ۇلكەن تاستاردان قانشا ءۇي مەن ادامداردىڭ زارداپ شەككەنىن مولشەرلەۋ قيىن.
"تۇنگى ساعات ۇشتە قارعالى وزەنىندە سۋ دەڭگەيى كوتەرىلگەنى تۋرالى حابار ءتۇستى. تاسقىننان الماتىنىڭ ىرگەسىندەگى كامەنكا مەن شاپاي اۋىلدارىنىڭ، ناۋرىزباي اۋدانىندا ءبىراز ۇيلەردى سۋ العان" دەپ مالىمدەدى الماتى توتەنشە جاعدايلار دەپارتامەنتى باستىعىنىڭ ورىنباسارى ەرلان نۇرپەيىسوۆ.
قالالىق توتەنشە جاعدايلار دەپارتامەنتى سەلدەن مەرت بولعان ادامدار جوق دەپ حابارلادى.
دەپارتامەنت وكىلى ەرلان نۇرپەيىسوۆ الەۋمەتتىك جەلىدە تاراعان "سۋ تاسقىنى قايتالانۋى مۇمكىن" دەگەن اقپاراتتى جوققا شىعاردى.
"تەك سۋ دەڭگەيى كوتەرىلگەن، بوگەنگە زاقىم كەلمەگەن. ەكىنشى رەت سەل ءجۇرۋ ءقاۋپى جوق، جاعدايدى باقىلاپ وتىرمىز" دەيدى ول.
تجد ءقازىر وقيعا ورنىندا 400-دەن اسا قۇتقارۋشى مەن 85 تەحنيكا جۇمىس ىستەپ جاتقانىن حابارلادى.
ال، الماتى قالاسىنىڭ اكىمى احمەتجان ەسىموۆ مىرزا قازىرگە ءۇنسىز. سۋ العان ايماقتى ءوزىنىڭ سۇيىكتى "ۆەرتالەتىمەن" شارلاپ ءجۇر دەگەن حابار تارادى. قازىرگە ۆەلەسيپەدتپەن ارالاعانى تۋرالى سىبىس جوق.
مۇمكىن بۇل سەل احمەتجان مىرزانىڭ "اكىم" تاعىنىڭ اقىرى بولار...
نۇرزات توعجان
،
