الماتى ءتىلسىز جاۋدان شوشىپ وياندى. جاۋ جاعادان العاندا كوپ دۇنيەنى اڭعارۋعا بولادى ەكەن. الدىمەن اقپاراتتىڭ وتە جىلدام تارايتىندىعىنا تاعى بر مارتە كوزمىز جەتتى. الايدا سول تاراپ جاتقان اقپارعا نە نانارىڭدى، نە سەنبەسىڭدى بىلمەي دال بولاسىڭ. قازاقستاندىق باق-تىڭ جۇمعان اۋزى اشىلمادى. ەش جەردە رەسمي مالىمدەمە جوق. رەسمي مالىمدەمە جاساۋعا اسىققان رەسمي ورىندار دا جوق. داۋرىققان حالىق بىر-بىرىنە قارايدى دا «ينتەرنەت نە دەيدى» دەپ قويادى. ينتەرنەت نە دەۋشى ەدى؟ اراسىندا الماتىعا قاتىسى جوق ۆيدەولاردى سالىپ، ونىسىز دا داۋرىققان حالىقتى ودان سايىن ۇرەيلەندىرىپ الۋدى ۇمىتپاعاندار دا ارامىزدان تابىلىپ جاتتى. شىنايى سۋرەتتەردى ءتۇسىرىپ، قالادان شىعىپ كەتۋگە كەڭەس بەرگەن حاتتار دا كەلىپ ءتۇستى. توتەنشە جاعدايلار باسقارماسىنا دا قاراشا حالىق مۇلدەم سەنىم ارتا المايدى ەكەن. وقيعا ورنىنداعى ادامدارعا «الدىمەن بيلىك تاراپىنان رەسمي مالىمدەمە جاسالسىن دا، داۋرىقپاساڭىزدارشى» دەپ جۇباتۋ ايتىپ كورىڭىزشى، سول جەردە-اق جاعاڭنان الىپ، سولارعا سەنگەنىڭ ءۇشىن ءوزىڭدى ايىپتى قىلادى نەمەسە «نەتكەن اقىماق ەدىڭ، ولار ەسكەرتەتىن بولسا، كەشە نەگە ەسكەرتپەپتى» دەگەن قارسى سۇراعىن ورتاعا تاستايدى. قارسى جاۋاپ قايىرا المايسىڭ. الماتى-بىشكەك تاس جولىنداعى التىن وردانىڭ جاياۋ جۇرگىنشىلەرگە ارنالعان كوپىرى مەن قاسكەلەڭنىڭ كوپىرىنە شىعىپ العان ادامداردى كورىپ ىشىڭنەن مىرس ەتىپ كۇلىپ تە قويىعىڭ كەلەدى. توتەنشە جاعداي باسقارماسىنا قاراعاندا قاراپايىم كوپىرگە سەنىم ارتادى ەكەن ءبىزدىڭ جەرلەستەرىمىز. ال سول تاس جولدا جول كۇتىپ، كولىك توقتاتىپ تۇرعانداردا قيساپ جوق. ءتىپتى پوليسيا قىزمەتكەرلەرى التىن ورداداعى ادامدارعا تاسجولعا شىعىپ كەتپەي، جولدان اۋلاق تۇرۋىن ەسكەرتىپ، ولاردى ارى قاراي ىسىرىپ الەك بولدى. جولدىڭ جيەگىنە ىسىرىلعان حالىق الماتىعا قاتتى وكپەلەپ تۇردى. ءتىپتى ساۋدا-ساتتىق ماقساتىمەن كەلگەن كورشىلەرىمىز «راحمەت ساعان، الماتى! بىشكەگىم تىنىش ەكەن » دەپ قويادى. فەيسبۋك الەۋمەتتىك جەلىسىن پايدالانۋشىلار دا قازاقستانعا قوناق سەزىنەتىن كەيبىر جۇرتتىڭ ءبۋىنىپ-تۇيىنىپ تايىپ تۇرعانىن جازۋدا. راسىمەن ەل باسىنا كۇن تۋسا، الماتىنى تاستاي قاشاتىندار كوپ ەكەن-اۋ دەگەن وي تۇيدىك.
ابىر مەن دابىر باستالعان ساتتە سابىلعان ادامداردى كورىپ ەسىڭە «تيتانيك» ءفيلمى ءتۇسىپ كەتەدى ەكەن. وندا كەمەنى قۇتقارۋ مۇمكىن بولماعاندا، حالىقتىڭ ۇرەيىن سەيىلتۋ ءۇشىن مۋزىكانتتار قۇربان بولمايتىن با ەدى؟ ۇرەيلى حالىق، اي-شايگە قارامايدى. سوندىقتان ولاردىڭ جۇيكەسىن تىنىشتاندىرۋ قاجەت. نەگىزگى ماقسات، ايەلدەر مەن بالالاردى قۇتقارۋ بولاتىن. ءبىراق كەۋدەدەگى جاندى كىم وپ-وڭاي بەرە سالماق؟ بارلىعى امان قالعىسى كەلەدى. سوندىقتان قۇتقارۋشىلارعا كەدەرگى بولماس ءۇشىن كەمەدەگى بالالار مەن نازىك جاندىلاردى اقىرىنداپ قايىقتارعا ورنالاستىراتىن ەدى عوي. ال بىزدە قالاي بولدى؟ تيتانيك سەكىلدى ءوزىمىز بارىپ الىپ مۇزعا سوقتىققان جوقپىز. كۇندەلىكتى اۋاسىمەن تىنىستاپ جۇرگەن تۋعان قالامىزعا ءتىلسىز جاۋ تايادى. قايدا باس ساۋعالارىمىزدى، اقپاراتتىڭ راس- وتىرىگىن بىلمەي دال بولدىق. ءبىزدىڭ ۇرەيلەنگەنىمىز دە، قورىققانىمىز دا، قىسقاسى ىشكى سەزىمىمىز ءۇشىن باس قاتىرىپ جاتقان ەشكىم جوق. ابدەن تاڭ بوزارىپ اتىپ، جانىمىزدى شۇبەرەككە ءتۇيۋدى ۇيرەنىپ قالعان ساتتە اسپاندا ۇشىپ جۇرگەن اكىمنىڭ سۋرەتىن كوردىك. اكىم تىكۇشاققا ءمىنىپ الىپتى، دەمەك جەردى شىنىمەن توپان سۋ باساتىنى راس دەپ توپشىلادىق. بىزدە ۇشىپ جۇرەتىن تىكۇشاق جوق، سوندىقتان كوپىرگە شىعىپ تۇرۋدى قاناعات تۇتتىق.
اينۇر تولەۋ
