وتكەن تۇندە الماتى قالاسى تۇرعىندارى توسىننان كەلگەن  سەل اپاتىنىڭ سالدارىنان ۇيلەرى مەن دۇنيەلەرىن تاستاپ، قالا سىرتىنا شىعىپ كەتكەنى تۋرالى اقپاراتتاردى قازاقستاندىق ب ا ق جازدى.  وسىدان كەيىن-اق، الەۋمەتتىك جەلىلەردە سەلدىڭ سۋرەتتەرى مەن ۆيدەولارى تارالىپ كەتتى.

ال الماتى قۇقىق قورعاۋ قىزمەتكەرلەرى ءقازىر الەۋمەتتىك جەلىلەرگە تارالعان بارلىق سۋرەتتەر مەن ۆيدەولاردى زەرتتەپ جاتىر،-دەپ حابارلايدى «قامشى» پورتالى Tengrinews.kz-كە سىلتەمە جاساي وتىرىپ.

ءتىپتى، جەلىلەردە تارالعان كوپشىلىك جاريالانىمنىڭ جالعان ەكەنىن الماتى قالالىق ءىىد باسپا ءسوز حاتشىسى سالتانات ازىربەك حانىم دا راستاپ وتىر.

الماتى قالالىق ءىىد-نىڭ سوزىنە سۇيەنەر بولساق، الماتى قالاسىنىڭ ءۇش بىردەي اۋدانىن جالماعان تابيعات اپاتىنىڭ ورنىنا  الەۋمەتتىك جەلىلەردە رەسەيدەگى سەلدىڭ ۆيدەوسىن سالىپ، جۇرتتى دۇرلىكتىرگەندەر دە بولعان ەكەن. قازىرگى تاڭدا  ءىىد وكىلدەرى الەۋمەتتىك جەلىدە الماتىداعى جاعدايمەن بايلانىستىرعان ادامدى ىزدەستىرىپ جاتىر. ق ر قىلمىستىق كودەكسىندە كورسەتىلگەندەي، جالعان اقپاراتتى تاراتقاندارعا 5000 اەك كولەمىندە ايىپپۇل نەمەسە 2 جىلدان 5 جىلعا دەيىن باس بوستاندىعىنان شەكتەۋ نەمەسە ايىرۋ جازاسى قاراستىرىلعان.

ەسكە سالا كەتەيىك، ناۋرىزباي اۋدانىنداعى قارعالى وزەن سۋىنىڭ دەڭگەيىنىڭ كوتەرىلگەندىگى جايلى حابار تۇنگى ساعات 03.00-دە ءتۇستى.

ءقازىر، وقيعا ورنىنا ق ر پرەمەر-مينيسترىنىڭ ءبىرىنشى ورىنباسارى بەردىبەك ساپاربايەۆ مىرزا مەن ق ر ءىىم ورىنباسارى ۆلاديمير بوجكو كەلگەن.

«قازسەلقورعاۋدىڭ» اقپاراتىنا سۇيەنسەك، پلوتينا جارىلماعان، ال قالانى باسىپ قالعان سۋدى شليۋز ارقىلى اعىزىپ جەبىرۋ جۇمىستارى جۇرگىزىلۋدە. ال اپاتتى ايماقتان 900-دەن استام ادام ءقاۋىپسىز ورىندارعا جەتكىزىلگەن.

ەسكەرە كەتەتىن تاعى ءبىر جايت، حالىققا الماتى قالاسىندا تۇڭگى ساعات 03:00 ششاماسىندا باستالعان سەل تۋرالى اقپاراتتى قۇزىرلى ورگانداردىڭ ەشبىرى بەرمەگەن. قازاقستاننىڭ قانشاما وبلىستارىن سۋ شايىپ، سەل باسىپ جاتسا دا بىلق ەتپەيتىن  تجك باسشىسى بوجكو مىرزا بۇل جولى دا ءۇنسىز. ءوزىنىڭ ورىنتاعىنا مىقتاپ جايعاسقان بوجكونىڭ الماتىداعى اپاتتان كەيىن مينكابينەتى ساقتالا ما؟ بيىلعى جىلدىڭ وزىندە، قازاقستاننىڭ 5 وبلىسىن سۋ شايىپ كەتكەندە بوجكو مىرزا نە ىستەدى؟ الماتىداعى سەل اپاتىنان كەيىن بوجكو مىرزا نە ىستەيدى؟  انشەيىندە، تەلەفونعا تىنىم بەرمەيتىن تجك سمس-لارى سەل تاسقىنى تۋرالى نەگە ءۇنسىز قالدى؟

ايتپاقشى، وسىنىڭ الدىندا قالا اكىمى احمەتجان ەسىموۆتىڭ  الەۋمەتتىك جەلىلەردەگى «ۆەرتولەتپەن» اپاتتى ايماقتاردى ارالاپ جۇرگەنى تۋرالى اقپارات تاراعان بولاتىن. ءبىراق، مۇنىڭ ءوزى ناقتى دالەلدەنبەگەن. ياعني، شىنىمەن دە اكىم مىرزا اپاتتى ايماقتاردى ارالاپ ءجۇر مە؟

نۇرزات توعجان