اباي قۇنانباي ۇلىنىڭ 170 جىلدىعىنا ارنالعان مەرەكەلىك شارالار لەگى «اباي جانە الەمدىك وركەنيەت» اتتى حالىقارالىق عىلىمي-پراكتيكالىق كونفەرەنسياسىنان باستاۋ الادى. كونفەرەنسياعا شەتەلدىك جەتەكشى ادەبيەتتانۋشىلار، فيلوسوف، تاريحشىلار، الەۋمەتتانۋشىلار، ءتىل ماماندارى مەن اباي شىعارمالارىن الەم تىلدەرىنە ءتارجىمالاعان شەتەلدىك اۋدارماشىلار قاتىسادى.
اعىمداعى جىلعى مەرەيتويدا حاكىم ابايدىڭ كەلبەتى جاڭا قىرىنان تانىلا تۇسپەك. مەملەكەتتىك ءتىلدى دامىتۋ قورىنىڭ قارجىلاندىرۋىمەن، اقبەرەن ەلگەزەكتىڭ اۆتورلىعىمەن تۇسىرىلگەن «اباي» دەرەكتى ءفيلمىنىڭ تۇساۋى كەسىلەدى. دەرەكتى فيلمدە كورەرمەن-قاۋىم حالىق اعارتۋشىسى ابايدى جاڭا قىرىنان تاني وتىرىپ، العان ءبىلىمى، شىعىس تاربيەسى جايلى قۇندى دەرەكتەرمەن جانە باسقا دا وسى ۋاقىتقا دەيىن بەيمالىم بولىپ كەلگەن تۇستارىمەن تانىسا الادى.
اباي اتىنداعى تەاتردا «ادامزاتتىڭ ابايى» اتتى سالتاناتتى شاراسى وتەدى. ارتىنشا ءدال وسى تەاتردا كورنەكتى ونەر مايتالماندارىنىڭ قاتىسۋىمەن كونسەرتتىك باعدارلاما جالعاسىن تابادى.
ابايدىڭ 170 جىلدىعىندا قوناق رەتىندە مەملەكەت جانە قوعام قايراتكەرلەرى، اقىندار، تۇركىتانۋشىلار، عالىمدار، پروفەسسورلار جانە اباي شىعارماسىن اۋدارعان شەتەلدىك جازۋشىلار كەلەدى.
مەرەكەلىك شارالار 7ء-شى تامىزدا اباي اۋدانىندا جالعاسادى. اۋدانىندا ورنالاسقان ەتنواۋىل، ءمۇراجاي-ۇيى، «اباي-شاكارىم» مەموريالدىق كەشەنى، «ەڭلىك-كەبەك» ەسكەرتكىشىندە بولعان شارا قوناقتارى، ماماي باتىر ەسكەرتكىشىنىڭ اشىلۋ سالتاناتىندا قاتىسادى. سونداي-اق، بۇل كۇنى قاراۋىلدا قازاق كۇرەسىنەن قازاقستان چەمپيوناتى، «جورعا جارىس»، «الامان بايگە»، «اباي تويىنىڭ باس پالۋانى» سىندى سايىستار وتەتىن بولادى. جوسپارلانعان ءىس-شارالار «ادامزاتتىڭ ءبارىن ءسۇي، باۋىرىم دەپ» اتتى رەسپۋبليكالىق اقىندار ايتىسىنا ۇلاسادى. بايراقتى باسەكەگە ەلىمىزدىڭ ءار اۋماعىنان كەلگەن 12 ۇزدىك ايتىسكەر قاتىسادى. ولاردىڭ اراسىندا سەرىكزات دۇيەنعازين، سارا توقتامىسوۆا، اينۇر تۇرسىنبايەۆا، ايبەك قالييەۆ سىندى تانىمال ايتىسكەرلەر ب ا ق سىناسادى.
اباي قازاقتىڭ ۇلتتىق جازبا ادەبيەتىنىڭ نەگىزىن قالاعان اعارتۋشى. ابايدىڭ ارتىندا قازاق حالقىنىڭ التىن قازىناسى -170 ولەڭ، 56 اۋدارما، پوەما، 40 «قارا ءسوز» جانە بۇگىنگى كۇنى تانىمال 200-گە جۋىق اندەرى مەن كۇيلەرى قالعان.
