اقوردانىڭ الدىنا بيلىكتەن جاردەم سۇراپ بارعان استانالىق تۇرعىن جەڭىسگۇل ەرمۇحامەتتىڭ وتباسىنا ۋاقىتشا پانالايتىن ەكى بولمەلى پاتەر بەرىلەتىن بولدى. بۇل تۋرالى «قامشى» پورتالى «ازاتتىققا» سىلتەمە جاساي وتىرىپ حابارلايدى. استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باستىعى ءلاززات ابۋيەۆا جەڭىسگۇل ەرمۇحامەتتى قابىلداپ، وعان ەكى بولمەلى ۋاقىتشا پاتەر بەرەتىنىن ايتقان. 

ءۇشىنشى توپتاعى مۇگەدەك جەڭىسگۇل ەرمۇحامەت وتباسىندا سەگىز بالا بارىن، كۇيەۋىنىڭ ەكىنشى توپتاعى مۇگەدەك ەكەنىن، 2004 جىلى قىتايدان شىعىس قازاقستان وبلىسى ۇلان اۋدانىنا قونىس اۋدارعان وتباسى بىلتىر استاناعا كوشىپ كەلگەنىن ايتادى. سوزىنە قاراعاندا، وسى كەزگە دەيىن 35 مىڭ تەڭگەگە باسپانا جالداپ تۇرىپ كەلگەن.

سەگىز بالاسىمەن بىرگە اقوردانىڭ الدىنا كەلگەن جەڭىسگۇلگە قالالىق پروكۋراتۋرا مەن قالا اكىمدىگىنەن كەلگەن وكىلدەر «اكىمدىككە بارىپ سويلەسۋدى" ۇسىنعان. ءبىراق ءوزىن پرەزيدەنت نازاربايەۆقا جولىقتىرۋدى تالاپ ەتكەن ايەل اكىمدىككە بارۋدان باس تارتقان. بۇدان سوڭ پوليسەيلەر ايەلدى بالالارىمەن بىرگە كولىككە كۇشتەپ وتىرعىزىپ، اقوردانىڭ الدىنان الىپ كەتكەن. جەڭىسگۇل وسىلايشا پرەزيدەنتپەن جولىعا المادى. ءبىراق ۋاقىتشا بولسا دا باسپانا ماسەلەسىن شەشە الدى.