اقتوبە وبلىسىندا وتكەن دەمالىس كۇندەرى قارتتار مەن مۇگەدەكتەرگە ارنالعان ينتەرنات ۇيىندە ءورت بولىپ، سونىڭ سالدارىنان وندا تۇراتىن 85 جاستاعى ايەل اسا اۋىر جاعدايدا اۋرۋحاناعا جەتكىزىلدى. بۇل تۋرالى «قامشى» قازاقپاراتقا سىلتەمە جاسايدى.

وبلىستىق ءتجد-نىڭ باسپا ءسوز قىزمەتىنەن حابارلاعانداي، بولمەلەردىڭ بىرىندە كەرەۋەتتەر ورتەنە باستاعان. وقيعا ورنىنا 6 تەحنيكا بىرلىگى مەن جەكە قۇرامنىڭ 27 ادامى جىبەرىلدى. الايدا ينتەرناتتىڭ قىزمەتكەرلەرى جالىندى ءورت سوندىرۋشىلەر كەلىپ جەتكەنشە وزدەرى سوندىرە الدى.

جەدەل مەديسينالىق كومەك اۋرۋحاناسى باس دارىگەرىنىڭ ورىنباسارى حيحمەتوللا كارىموۆ زارداپ شەككەن ايەلدىڭ تەرىسىنىڭ 70 پايىزىن كۇيىك شالعانىن حابارلادى.

«ناۋقاس جالپى جانساقتاۋ بولىمىندە جاتىر. ونىڭ جاعدايى وتە اۋىر، قولدانىپ وتىرعان شارالارعا قاراماستان، جاعدايى كۇن سايىن ناشارلاپ بارادى»، - دەدى دارىگەر.

پوليسيا ءورتتىڭ شىعۋ سەبەپتەرىن انىقتاپ جاتىر.

نۇرزات توعجان