ءدال قازىرگى قالىپتاسقان بيلىك فابريكاسىنىڭ بيىك دالىزىندە جۇرگەندەر مەن كەزىندە جوعارعى ەتتالوندار قاتارىندا بولىپ، ءتۇرلى سەبەپتەرمەن سىزىلىپ قالعاندار تۋرالى توپتامانىڭ كەلەسى كەيىپكەرى – اسلان  مۋسين.

ءبىر كەزدەرى تۇكىرىگى جەرگە تۇسپەگەن اسلام مۋسين ءقازىر قايدا ءجۇر؟ جۇرت اۋزىنداعى «مۋسين شەتەلگە قاشىپ كەتىپتى» نەمەسە «مۋسين گەرمانيادا ەم الىپ ءجۇر ەكەن، دەنساۋلىعى سىر بەرىپتى» دەگەن سىڭارجاق قاۋەسەتتەر قانشالىقتى شىندىققا جاناسادى؟ قازىرگى نازاربايەۆ قالىپتاستىرعان باسقارۋشى جۇيە ءبىر كەزدەگى ءوزىنىڭ ساقالارىنىڭ ىشىندەگى ادۋىندىسىن نەلىكتەن كەرەكسىز ەتتى؟ سوندا، اسلان ءمۋسيننىڭ ساياساتتاعى ءرولى  شاحمات تاقتاسىنداعى «پەشكا» سەكىلدى بولعانى ما؟

ەستەرىڭىزدە بولسا، اسلان ءمۋسيننىڭ تىكەلەي قاراماعىندا، قورعانىندا بولعان اتىراۋ وبلىسىنىڭ ەكس-اكىمى بەرگەي رىسقالييەۆتى پرەزيدەنت ورنىنان الىپ تاستاعاندا مۋسينگە قاتىستى ءتۇرلى ساياسي بولجامدار جاسالعان. سول كەزدەگى ەسەپ كوميتەتىنىڭ ءتوراعاسى لاۋازىمىنان بوستىلعان اسلان مۋسين ەۋروپاعا قاشىپ كەتىپتى، ەندى كەلمەيتىن سەكىلدى دەگەن سىبىستار كەۋلەگەنى تۋرالى قازاقستاندىق ب ا ق از جازبادى (http://shyn.kz/article/view؟id=44). ءتىپتى، كەيبىر اقپارات كوزدەرىنىڭ ايتۋىنشا، اسلان مۋسين وزىنە شىن بەرىلگەن ادامداردىڭ بارلىعىنا شەتەلگە قاشۋعا كەڭەس بەرگەن-مىس. ەكس-ماجىلىس دەپۋتاتى امانجان رىسقالييەۆ تۇتقىندالعان سوڭ، ءمۋسيننىڭ باسىنا قارا بۇلت ۇيىرىلە باستاعانىن سول كەزدە ءوزى دە سەزسە كەرەك-تى.

«رەسپۋبليكا» باسىلىمنىڭ جازۋىنا قاراعاندا اسلان مۋسين ءقازىر شەتەلدەگى قاشىپ جۇرگەن وزگە دە قازاقستاندىق ساياسي ەميگرانتتارمەن كەلىسسوزدەر جۇرگىزۋگە تالپىنىپ جاتقان كورىنەدى. اسىرەسە، مۇحتار ءابليازوۆتىڭ كوڭىلىن تاۋىپ، ونىمەن بىرلەسىپ اقورداعا قارسى كومپروماتتار جاريالاماقشى ەكەن.

سونىمەن، جوعارىداعى ايتىلعانداردان ۇققانىمىز، مۋسين رىسقالييەۆتەردىڭ كەسىرىنەن ويىننان شىعىپ قالىپ، شەتەلدەگى بيلىك وپپونەنتتەرىمەن اۋىز جالاسا باستاعان-مىس.

ال رەسمي ورگانداعىلار بولسا، ازاتتىق سايتىنا بەرگەن اقپاراتىندا  «ەسەپ كوميتەتىنىڭ ءتوراعاسى اسلان مۋسين اعىمداعى جىلدىڭ قازان ايىنىڭ سوڭىنا دەيىن كەزەكتi جىل سايىنعى ەڭبەك دەمالىسىندا بولادى، قازiرگى ۋاقىتتا ول گەرمانيادا ءدارiگەرلiك تەكسەرۋدەن وتۋدە»، - دەلىنگەن (http://azh.kz/kz/news/view/4092 ). 2012 جىلدىڭ اقپاراتىندا كوميتەتتىڭ اپپارات جەتەكشىسى  ۆيكتور سۋپرۋن  اسلان ءمۋسيننىڭ پرەزيدەنت اكىمشىلىگىنىڭ كەلىسىمى بويىنشا دەمالىستا ەكەنىن، «رەسپۋبليكا» سايتىندا جاريالانعان «ونىڭ قاشۋىنا» قاتىستى مالىمەت شىندىققا جاناسپايتىنىن جەتكىزگەن. سونىمەن وپوزيسيالىق باق-تار جازعان ءمۋسيننىڭ شەتەل اسىپ كەتكەندىگى جالعان بولىپ شىققانى ما؟

ءيا، ءمۋسيندى قاشتى دەۋ جالعان بولعانىمەن، شەتەل اسقانى شىندىق. داۋىرىندە دۇركىرەپ تۇرعان، تۇكىرىگىن جەرگە تۇسىرمەيتىن سەنىمدى قالقاندارى مەن قولشوقپارلارى بار، ق ر پرەزيدەنت اپپارىتىن باسقارعان، ق ر ەسەپ كوميتەتىن ۇرشىقتاي يىرگەن اسلان مۋسين ءقازىر قاراپايىم ەلشى عانا.

 ءبىر كەزدەرى ءمۋسيننىڭ سۇسىنان سەسكەنبەيتىندەر از ەدى اۋ... اعايىندى رىسقالييەۆتەرگە قالقان بولامىن دەپ ءجۇرىپ، وپىق جەگەن مۋسين جۋىق ارادا ەلگە ورالۋى مۇمكىن دەگەن سىبىس بار. ءيا، اكەجان قاجىگەلدين مەن اسلان ءمۋسيننىڭ ۇلكەن ساياساتتاعى سوڭعى جۇرىستەرى بۇل ەمەس- اۋ... ايتاپقشى ءبىر كەزدەرى پرەزيدەنتتىڭ قاھارىنا ۇشىراعاندارعا بيىلدان باستاپ راقىمشىلىق جاسالىپ، كول اساعان كوپ شەنەۋنىكتىڭ قايتا بوستاندىققا جىبەرىلۋىندە دە ءبىر گاپ بولسا كەرەك. سونداي ءبىر راقىمشىلىققا ءىلىنىپ، اسلان مۋسين قايتا ەڭسە تىكتەسە بيلىكتىڭ اۋا-رايى قالاي قۇبىلار ەكەن؟

نۇرگەلدى ءابدىعاني ۇلى