وسى جەكسەنبى كۇنى بۇۇ-نا مۇشە ەلدەر جەتەكشىلەرى 2015 جىلدان كەيىنگى جاھاندىق دامۋ ماسەلەلەرى جونىندەگى قۇجاتتى قابىلداۋعا كەلىستى. 2 جىلدان بەرى تۇجىرىمداماسى دايىندالىپ كەلگەن 29 بەتتىك قۇجاتتى راسىمدەۋ قىركۇيەك ايىنا جوسپارلانىپ وتىر. بۇل تۋرالى تاسس حابارلاعان.

اتالمىش قۇجاتتا 15 جىلعا جوسپارلانعان 170 باعىت بويىنشا ماسەلەلەردى شەشۋ جولدارى  قاراستىرىلعان.

سونىڭ ىشىندە ەڭ ماڭىزدىسى – الەم مەملەكەتتەرىندەگى كەدەيشىلىك جانە ونىڭ بارلىق سيپاتىمەن كۇرەسۋ. اشتىققا ۇشىراعان ەلدەرگە ازىق-تۇلىكتى جەتكىزۋ، سالاۋاتتى ءومىر سالتى، جىنىس تەڭدىگى (گەندەرلىك تەڭدىك)، تۇراقتى ەنەرگەتيكاعا قولجەتىمدىلىك، ەكونوميكالىق ءوسىم، جاڭا جۇمىس ورىندارىن اشۋ ت.ب. ماسەلەلەردى شەشۋ جولدارى قاراستىرىلعان.

بۇۇ باسشىلارىنىڭ بۇل قۇجاتتارىنىڭ نەگىزىندە 700 ميلليونعا جۋىق ادامدى كەدەيدىكتەن قۇتقارۋ ماقسات ەتىلگەن. سونىمەن قاتار، عالامدىق اشتىق، جۇقپالى ىندەتتەر، جىنىس تەڭسىزدىگى، اۋىز سۋمەن قامتاماسىز ەتۋ جانە سانيتاريا ماسەلەلەرى دە جوسپارلانعان 15 جىلدىڭ كولەمىندە تولىق شەشىلەدى دەپ كۇتىلۋدە.

«ءبىز ادامزاتتى تيرانداردىڭ زۇلىمدىعىنان، اشتىق پەن اۋرۋدان، كەدەيلىك پەن كىرىپتارلىقتان قۇتقارۋ ءۇشىن، وسى جانە ەرتەڭگى ۇرپاق ءۇشىن  عالامشارىمىزدى بۇگىن قورعاۋىمىز كەرەك.  عالامدى تۇراقتى بولاشاققا باستاۋ ءۇشىن وسىنداي باتىل ءارى ماڭىزدى شەشىمدەردى ەرتەڭگە قالدىرۋعا بولمايدى»،-دەيدى بۇۇ باس حاتشىسى پان گي مۋن مىرزا.
 

نۇرزاتتوعجان

«قامشى» سىلتەيدى