قازاقستان پرەزيدەنتى نۇرسۇلتان نازاربايەۆ ق ر مادەنيەت جانە سپورت ءمينيسترى ارىستانبەك مۇحاماديۇلىمەن كەزدەسىپ، «بولاشاققا ناقتى 100 قادام» جوباسىنىڭ اياسىندا  قازاق حاندىعىنىڭ 550 جىلدىعىن تويلاۋ ماسەلەلەرىن تالقىلادى.  بۇل تۋرالى «قامشى» پورتالى اقوردانىڭ باسپاسوز-قىزمەتىنە سىلتەمە جاساي وتىرىپ حابارلايدى.

پرەزيدەنت ءوزىنىڭ سوزىندە، اتالمىش داتانى تويلاۋ ءوز دەڭگەيىندە ءوتۋى ءۇشىن بار سالماقتىڭ مادەنيەت مينيسترىنە تۇسەتىنىن ەسكەرتكەن بولاتىن.

«وسى ۋاقىتقا دەيىن مەملەكەت تاريحىن زەرتتەيتىن ينستيتۋت قالىپتاستى. ءبىزدىڭ كوپتەگەن تاريحشىلارىمىز شەتەلدەرگە شىعىپ، تاريحي ماتەريالداردى ىزدەستىردى جانە ءبىرتالايىن تاپتى دا. ەندى ءبىرىڭعاي ۇلت بولۋ ءۇشىن، سونداي-اق جاستارىمىزدى پاتريوتتىققا تاربيەلەۋ ءۇشىن بىزگە قازاقستاننىڭ جان-جاقتى تاريحى ماڭىزدى»، - دەدى  ەلباسى.

دەسە دە پرەزيدەنت نازاربايەۆ الەم مەملەكەتتەرىندەگى داعدارىستى تىلگە تيەك ەتە كەلە،  الاعاي دا، بۇلاعاي شاقتا، ەكونوميكانىڭ السىرەپ تۇرعان كەزەڭىندە حاندىق تويىن ارتىق شىعىنسىز اتاپ ءوتۋ كەرەكتىگىن ەسكەرتتى. «ءيا، ارتىق شىعىنسىز، ءبىراق ساپالى بولۋى كەرەك. جۇرتتىڭ ەسىندە كوپكە دەيىن ساقتالاتىن بولسىن»، - دەگەن پرەزيدەنت تاپسىرماسىن مينسيتر مىرزا باس شۇلعىپ، قابىل الماسقا شارا قايسى؟!

ەلباسى نۇرسۇلتان نازاربايەۆ، شارانىڭ باستى ماقساتى ۇلتجاندىلىقتى نىعايتىپ، قازاقستاندىقتاردىڭ رۋحاني دەڭگەيىن ءوسىرۋ ەكەنىن دە ناقتىلاپ وتكەن.

ال ق ر مادەنيەت جانە سپورت ءمينيسترى ارىستانبەك ءمۇحامادي ۇلى ءوز كەزەگىندە،  حاندىقتىڭ تويى استانا جانە تاراز قالالارىندا تويلاناتىنىن ايتتى.

«قازاق حاندىعىنىڭ 550 جىلدىعىن مەملەكەتتىك دەڭگەيدە اتاپ ءوتۋ ول – قازاقستاندىقتاردىڭ بىرلىگىن نىعايتۋعا ۇلكەن سەپ بولاتىن اۋقىمدى شارا. ءبىرىنشى كەزەكتە، ءقازىر ءبىزدىڭ ءجىتى دەن قويىپ وتىرعانىمىز حاندىقتىڭ تويىنا ۇيىمداستىرىلاتىن حالىقارالىق عىلىمي-پراكتيكالىق كونفەرەنسيالار. سونىمەن قاتار، قازىرگى تاڭدا تاراز قالاسىندا ەتنوگرافيالىق مۇراجاي مەن ورتالىق قۇرىلىسى باستالدى. كۇردەلى ارحەولوگيالىق جۇمىستار دا جۇرگىزىلۋدە»،-دەدى مينيستر مىرزا.

نۇرزات توعجان