كەشە كەزەكتى رەت اپپاراتتىق جيىن وتكىزگەن استانا قالاسىنىڭ اكىمى ادىلبەك جاقسىبەكوۆ مىرزا كۇن تارتىبىندەگى ءبىرقاتار ماسەلەلەردى تالقىعا سالعان. سونىڭ ىشىندە استانا قالاسىنداعى بيزنەسكە قولايلى جاعداي قالىپتاستىرۋ ماسەلەسى دە ءسوز ەتىلگەن بولاتىن.بۇل تۋرالى «قامشى» پورتالى استانا قالالىق اكىمدىكتىڭ باسپاسوز-قىزمەتىنە سىلتەمە جاساي وتىرىپ حابارلايدى.
قالاداعى بيزنەس-كليماتتى جاقسارتۋ ءۇشىن رۇقسات بەرۋ پروسەدۋرالارىن ازايتۋ كەرەك، دەپ ساناعان ەلوردا باسشىسى جاقسىبەكوۆ مىرزا، بارلىق مەمقىزمەتتەر تەك قانا حقكو ارقىلى جۇزەگە اسىرىلۋى ءتيىس جانە سايكەسىنشە قىزمەت كورسەتۋ ۋاقىتى ۇزاق بولماۋى كەرەكتىگىن ايتتى.
سونداي-اق، بۇل باعىتتا مەملەكەتتىك قىزمەت كورسەتۋدەگى بيزنەس-ۇدەرىستەردى زەردەلەپ، ولاردى وڭتايلاندىرۋ بويىنشا ۇسىنىستار ەنگىزۋ ءۇشىن ارنايى جۇمىس توبىن قۇرۋ كەرەكتىگى ايتىلدى.
“بۇل جۇمىسقا بيزنەس-قاۋىمداستىق پەن كاسىپكەرلەر پالاتاسىن تارتۋ قاجەت. بۇل جۇمىستاردى باسقارۋدى الييەۆ ءنۇرالى راحاتۇلىنا تاپسىرامىن. باستى ماقسات – استانانى بيزنەس جۇرگىزۋ ءۇشىن ەلىمىزدەگى ەڭ قولايلى قالاعا اينالدىرۋ. بۇل باعىتتاعى جۇمىستاردىڭ ماڭىزدىلىعىن تۇسىنبەيتىن جانە ءوز وكىلەتتىگىنەن ايرىلعىسى كەلمەيتىن باسشىلار جۇمىستان بوساتىلادى”، – دەدى اكىم مىرزا.
نۇرزات توعجان
