شقو اكىمى دانيال احمەتوۆ مەملەكەتتىك كوروناۆيرۋسقا قارسى قاۋىپسىزدىك شارالارىن كۇشەيتۋ ماقساتىندا سەمەي جانە وسكەمەن قالاسىنا بىرنەشە شەكتەۋلەر ەنگىزەدى. بۇل تۋرالى وبلىس اكىمىنىڭ ورىنباسارى ونلاين-بريفينگ كەزىندە الىشەر مارحابات حابارلادى. 

2 ساۋىردەن كەيىن سەمەي جانە وسكەمەن قالالارىنا كىرىپ-شىعۋ قاتاڭ باقىلاۋعا الىنادى. وبلىس ورتالىعى مەن سەمەي قالاسىندا 15 وتكىزۋ پۋنكتى قويىلادى. بلوك پوستتاعى پوليسيا قىزمەتكەرلەرى تۇرعىنداردى تىركەۋ قۇجاتىن تەكسەرگەننەن سوڭ كىرگىزەدى. 

ال 6 ساۋىردەن باستاپ سەمەي جانە وسكەمەن تۇرعىندارى جاسىل جانە اق ءتۇستى ەكى ءتۇرلى رۇقسات قاعازبەن ءجۇرىپ-تۇرادى. ءبىرىنشى ءتۇرى – قالالاردىڭ تىنىس-تىرشىلىگىن قامتاماسىز ەتەتىن ۇيىم قىزمەتكەرلەرى، جۇمىس ىستەيتىن ازاماتتارعا ارنالعان. ەكىنشى ءتۇرى – ءاربىر وتباسىنا بەرىلەدى. تىركەۋ ءنومىرى تاق سانمەن اياقتالاتىن تۇرعىندار كۇنتىزبەنىڭ تاق كۇنى، جۇپپەن جانە 0 مەن اياقتالاتىندار تەك جۇپ كۇندەرى قالادا جۇرەتىن بولادى. ءبىراق تۇندە قالاداعى قوزعالىس توقتايدى. 

وبلىس اكىمىنىڭ ورىنباسارى الىشەر مارحابات، ءاربىر قالا تۇرعىنىندا ايىنا 15 رەت قالادا ءجۇرىپ-تۇرۋىنا مۇمكىندىك بارىن ايتتى. رۇقسات قاعازى ءار پاتەرگە بىرەۋدەن بەرىلەدى. 

"ءار پاتەر تۇرعىنى اپتاسىنا 3 رەت قانا قالادا جۇرە الادى. نە كۇنتۇزبەنىڭ تاق كۇندەرى نەمەسە جۇپ كۇندەرى. سىرتقا شىققان قالا تۇرعىنىنىڭ رۇقسات قاعازىن پوليسيا قىزمەتكەرلەرى تەكسەرەدى"، - دەدى الىشەر مارحابات. 

"ءار ادام مىندەتتى تۇردە وزىمەن بىرگە جەكە كۋالىگىن دە الىپ ءجۇرۋى كەرەك. رۇقسات قاعازىنىڭ جارامدىلىق مەرزىمى – 1 اي. كوپقاباتتى ۇيدە تۇراتىندار اتالمىش قاعازدى الۋ ءۇشىن 1 ساۋىردەن باستاپ پيك-كە جانە كوندومينيۋمعا جۇگىنۋلەرى كەرەك. ال جەر ءۇي تۇرعىندارى جەرگىلىكتى باسقارۋ كوميتەتتەرىنە بارۋى قاجەت"، - دەدى وسكەمەن قالاسىنىڭ اكىمى جاقسىلىق ومار.

سونداي-اق ازىق-تۇلىك دۇكەندەرىنەن بولەك ءىرى ساۋدا ورىندارىنىڭ قىزمەتى توقتاتىلادى. 70 جاستان اسقان قاريالار مەن ءبىرىنشى جانە ەكىنشى توپتاعى مۇگەدەكتەرگە ازىق-تۇلىك پەن دارى-دارمەك ۇيلەرىنە جەتكىزىلەدى. 

وبلىس اكىمىنىڭ ورىنباسارى شاكارىم بۇقتۇعۇتوۆتىڭ ايتۋىنشا، شقو-دا  الەۋمەتتىك ماڭىزى بار ازىق-تۇلىك ونىمدەرىنىڭ 19 ءتۇرى، گيگيەنا زاتتارىنىڭ 10 ءتۇرى كىرەتىن 4 توپتاما جاسالعان. بۇل پاكەتتەر 70 جاستان اسقان زەينەتكەرلەر مەن ءبىرىنشى جانە ەكىنشى توپتاعى مۇگەدەكتەرگە اپتاسىنا ءبىر رەت تەگىن جەتكىزىلەتىن بولادى. 

وبلىستىڭ دەنساۋلىق ساقتاۋ باسقارماسىنىڭ باسشىسى ءىلياس مۇحامەدجاننىڭ ايتۋىنشا، كارانتيندىك ستاسيوناردا 61 ادام جاتىر. 

"ولاردىڭ دەنساۋلىقتارى ءبىرقالىپتى. سونداي-اق ءۇي كارانتينىندە 662 جاتىر. ولار وقشاۋلانعان جانە دارىگەرلەردىڭ باقىلاۋىندا. اۋرۋحانالار قاجەتتى جابدىقتارمەن قامتىلعان. ينفەكسيالىق توسەكتىڭ سانى - 500، پروۆيزورلىق توسەكتىڭ سانى - 600، ال كارانتيندىك توسەكتىڭ سانى - 2505. قاجەتتى جاعدايدا ينفەكسيالىق توسەكتىڭ سانى - 913-كە دەيىن، پروۆيزورلىق توسەكتىڭ سانى - 1000-عا دەيىن، ال كارانتيندىك توسەكتىڭ سانى 4500-گە دەيىن جەتەدى. كوروناۆيرۋس تەستىنىڭ ناقتىلىعى جوعارى دەڭگەيدە. بارلىق كوروناۆيرۋس تەستى كحر، اقش، گەرمانيا ەلدەن اكەلىندى جانە ارنايى سەرتيفيكاسيالاۋدان وتكەن"، - دەيدى وبلىستىق دەنساۋلىق ساقتاۋ باسقارماسىنىڭ باسشىسى. 

شقو ءبىلىم باسقارماسىنىڭ باسشىسى سايرانگۇل جۇماديلوۆا بريفينگ بارىسىندا 2 ءساۋىر كۇنى ونلاين فورماتتا اتا-انالار جينالىسى وتەتىنىن ايتتى. ونلاين جينالىس كەزىندە سىنىپ جەتەكشىلەر اتا-انالارعا قاشىقتىقتان وقىتۋ پروسەسسىنىڭ قالاي ۇيىمداستىرىلاتىنىن، جانە اتا-انالار تاراپىنان قانداي كومەك قاجەت بولاتىنىن تۇسىندىرەدى.

ونلاين-بريفينگ كەزىندە شقو اكىمىنىڭ ورىنباسارى الىشەر مارحابات تۇرعىنداردى الاڭداماۋعا شاقىرىپ، سۇراقتارعا جاۋاپ بەردى. 

"كومپيۋتەرى جوق وقۋشىلار مەكتەپتىڭ قارجىسى ارقىلى كەرەك جابدىقتارمەن قامتاماسىز ەتىلەتىن بولادى. الىس اۋىل-ايماقتاردا ينتەرنەت جەلىسىنە قوcىلا الماعان وقۋشىلارعا دا كەرەكتى جاعداي جاسالاتىن بولادى. سونىمەن قاتار، بالالار تەلەارنا ارقىلى دا ونلاين تۇردە ءبىلىم الۋدى جالعاستىرۋعا مۇمكىندىك بار. ورىس ءتىلدى مەكتەپتە وقيتىندار ءۇشىن "ەل ارنا" تەلەارناسى، قازاق ءتىلدى مەكتەپ وقۋشىلارى ءۇشىن "بالاپان" تەلەارناسى جۇمىس ىستەيدى. سوندىقتان قاشىقتىقتان ءبىلىم الۋ كەزىندە الاڭداۋعا نەگىز جوق"، - دەيدى الىشەر مارحابات.