مۇناي باعاسىندا بۇگىن تاريحتا بولماعان انتيرەكورد تىركەلدى. قارا التىننىڭ باعاسى العاش رەت 0 دوللاردان تومەنگە ءتۇستى. وسى جاعدايعا بايلانىستى قامشى ءتىلشىسى شەتەل باسىلىمدارىنا، اسىرەسە، Reuters جانە Al Jazeera-نىڭ ساراپتامالارىنىڭ پىكىرلەرىنە شولۋ جاسادى. 

مۇناي باعاسىندا تاريحي قۇلاۋ ورىن العاننان كەيىن كوپ ۇزاماي باعا ءبىرشاما قالپىنا كەلدى. العاش رەت امەريكا قۇراما شتاتتارى مۇنايىنىڭ باعاسى $ 0-دان تومەنگە ءتۇستى. سوڭىنان بىرتىندەپ كوتەرىلە باسادى.

اقش-تىڭ West Texas Intermediate (WTI) ماركالى مۇناي جەتكىزىلىمى الدىڭعى سەسسيادا باررەلىنە 37،63 دوللارعا ارزانداعاننان كەيىن، ءبىر باررەل ءۇشىن $ 38،73 دوللارعا كوتەرىلدى.

WTI ءۇشىن مامىر ايىنداعى كەلىسىمشارت سەيسەنبىدە اياقتالدى، ال نەعۇرلىم بەلسەندى ساۋدا جاسايتىن ماۋسىمدىق كەلىسىمشارت بويىنشا باررەلىنە $ 1،72 سەنت نەمەسە 8،4% كوتەرىلىپ، باررەل ءۇشىن $ 22،15 قۇرادى.

AxiCorpء-تىڭ ازيا-تىنىق مۇحيتى نارىقتارىنداعى ستراتەگى ستيۆەن يننەس Al Jazeera-عا اقش شيكىزاتتىق فيۋچەرستەرىنىڭ تەرىس باعاسى جاي عانا تەحنيكالىق سالدار بولعانىنا قاراماستان، "بۇل سۇرانىستىڭ بۇزىلعانىن بىلدىرەدى، ويتكەنى ەشكىم مۇنايدى ساقتاعىسى كەلمەيدى" دەگەن.

– ەگەر وپەك بۇدان ءارى مۇناي ءوندىرىسىن قىسقارتپاسا، وسىلاي كەتە بەرەتىن بولسا، نەسيەلىك، بانكتىك ريسكتەر، جۇمىسسىزدىق ريسكى سياقتى كوپتەگەن قيىندىقتارعا اكەلۋى مۇمكىن، – دەدى يننەس.

جاھاندىق ەتالوندىق Brent ماركالى مۇناي باعاسى ماۋسىم ايىندا جەتكىزىلىم ءۇشىن 49 سەنت نەمەسە 1،9 پايىزعا كوتەرىلىپ، باررەلىنە $ 26،06 بولدى.

– COVID-19 سالدارىنان تۋىنداعان سۇرانىستىڭ ازايۋى اقش ەكونوميكاسىنىڭ باياۋ قايتا قالپىنا كەلۋىنە اكەپ سوقتىرادى، – دەدى OANDA بروكەرى، اعا ساراپشىسى ەدۆارد مويا مۇناي باعاسىنىڭ ءالسىز كەزەڭىن بولجاپ.

ونىڭ ايتۋىنشا، WTI مۇنايىنىڭ ماۋسىمدىق كەلىسىم-شارتى ءبىر باررەل ءۇشىن 20 دوللاردى ۇستاپ تۇردى. ال، مامىرداعى كەلىسىمشارت بويىنشا، وسى جولعى اۋىر سوققىدان كەيىن از عانا پايدا كورە باستايدى.

– تۋريزمگە شەكتەۋلەر مەن كارانتين سياقتى شارالار مۇناي باعاسىنا كەرى اسەر ەتتى. بۇنداي كوروناۆيرۋس شەكتەۋلەرى جاھاندىق وتىندى پايدالانۋدى شەكتەيدى، سۇرانىستى الەم بويىنشا 30 پايىزعا تومەندەتەدى. سالدارىنان شيكىزات قورلارىنىڭ وسۋىنە اكەلىپ سوقتى دا، ونى ساقتاۋ ورىندارىن تابۋ قيىنداي ءتۇستى، – دەدى ەدۆارد مويا.

ال، اقش-تىڭ وكلاماحا شتاتى، كۋشينگتەگى باستى مۇناي ساقتاۋ ورنى بىرنەشە اپتادا تولادى دەپ كۇتىلۋدە.

– بۇگىنگى تاڭدا نارىقتاعى نەگىزگى ماسەلە – بۇل اقش-تاعى ۇسىنىستىڭ ارتۋى جانە ساقتاۋ سىيىمدىلىعىنىڭ بولماۋى، – دەدى سيدنەيدەگى CMC Markets باس ماركەتولوگى مايكل ماككارتي.

داعدارىسقا بايلانىستى مۇناي ەكسپورتتاۋشى ەلدەر ۇيىمى (وپەك) جانە ونىڭ وداقتاستارى رەسەي، جالپى وپەك + دەپ اتالاتىن توپ ەلدەر ءوندىرۋدى كۇنىنە 9،7 ميلليون باررەلگە قىسقارتۋعا كەلىستى. ءبىراق بۇل كەلىسىم مامىر ايىنان كەيىن باستالادى. ءبىراق ولار كەلىسكەن مۇناي ءوندىرىسىن قىسقارتۋ مولشەرى نارىقتاعى تەپە-تەڭدىكتى قالپىنا كەلتىرۋگە جەتكىلىكتى ىقپال ەتپەۋى مۇمكىن دەيدى ساراپشىلار.

Al Jazeera-عا سۇحبات بەرگەن يننەس "وپەك + ءوندىرىستى كوپ مولشەردە قىسقارتۋدى قاراستىرۋى مۇمكىن جانە اقش جەتكىزىلىمنىڭ تومەندەۋىن قاراستىرۋعا ءماجبۇر بولادى، ويتكەنى مۇناي باعاسىن دۇرىستاۋ ءۇشىن "بارلىعى بىرگە جۇمىس جاساۋعا ءتيىس. ءقاۋىپ تىم جوعارى" دەدى ول.

بۇل ءقاۋىپ تەك قارجى نارىعىندا شيكى مۇناي ساتىپ الاتىن ينۆەستورلارعا عانا ەمەس، سونىمەن بىرگە مۇناي-گاز سالاسىندا جۇمىس ىستەيتىن ميلليونداعان ادامدارعا دا بايلانىستى ەكەنىن ايتتى.

رەيتەر اقپاراتتىق اگەنتتىگىنىڭ بەس ساراپشىسى جۇرگىزگەن ساۋالناماعا سايكەس، اقش-تاعى شيكىزات قورلارى ءساۋىردىڭ 17-سىنە دەيىنگى ءبىر اپتا ىشىندە شامامەن 16،1 ميلليون باررەلگە وسكەن. بۇل – تاريحتاعى ەڭ كوپ مولشەر. ساراپشىلار وتكەن اپتادا بەنزين قورى 3،7 ميلليون باررەلگە ءوستى دەپ بولجاپ وتىر.