بۇل تۋرالى Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Facebook-تاعى پاراقشاسىندا جازدى
«كەشە مەملەكەت باسشىسى قاسىم-جومارت توقايەۆ مالىمدەمە جاساپ، ەلدىڭ اعىمداعى الەۋمەتتىك جانە ەكونوميكالىق كۇن ءتارتىبى مەن مەملەكەتتىڭ داعدارىستان كەيىنگى دامۋىنىڭ نەگىزگى باعىتتارىن بەلگىلەدى. ازاماتتارىمىزدىڭ ءومىرى مەن دەنساۋلىعىنىڭ بارىنەن قىمبات ەكەنى ەسكەرىلە وتىرىپ، توتەنشە جاعداي رەجيمىن 11 مامىرعا دەيىن ۇزارتۋ تۋرالى شەشىم قابىلداندى. پرەزيدەنت وسىنداي كۇردەلى كەزەڭدە ەشكىمنىڭ نازاردان تىس قالماي، بارشا مۇقتاج جاندارعا قولداۋ كورسەتىلەتىنىن اتاپ كورسەتتى. ماسەلەن، بۇگىنگى كۇنگە دەيىن 4 ميلليوننان استام ادام تىكەلەي قارجىلىق كومەك الىپ، 570 مىڭداي ادامعا ازىق-تۇلىك جيىنتىعى ۇلەستىرىلگەن. جالپى، ازىق-تۇلىك سەبەتىمەن 1،1 ملن. ادام قامتىلىپ، 1،6 ملن. ادامنىڭ كوممۋنالدىق تولەمدەرىنىڭ مەرزىمى كەيىنگە شەگەرىلەتىن بولادى»، - دەپ اتاپ ءوتتى باۋىرجان بايبەك.
ونىڭ ايتۋىنشا، مەملەكەت باسشىسى وسىناۋ قىسىلتاياڭ شاقتا نۇروتاندىقتاردىڭ، بەلسەندىلەر مەن ۆولونتەرلاردىڭ اتقارىپ جاتقان جۇمىستارىن جوعارى باعالاعان. جاسوتاندىقتار 90 مىڭ مۇقتاج وتباسىعا ازىق-تۇلىك جيىنتىعىن، انتيسەپتيك قۇرالدارىن جەتكىزىپ بەردى. بۇعان قوسا ەلوردادا، الماتى مەن شىمكەنت قالالارىندا 100 مىڭ وتباسى تەگىن ماسكالارمەن قامتاماسىز ەتىلدى.
«سونىمەن بىرگە ەلباسىنىڭ باستاماسىمەن قۇرىلعان «Birgemiz» قورى 330 مىڭ مۇقتاج وتباسىعا 50 مىڭ تەڭگەدەن ءبىرجولعى قارجىلاي كومەك اۋداردى. بۇگىن-ەرتەڭ تاعى دا 30 مىڭنان استام وتباسى قامتىلاتىن بولادى. ۇلى جەڭىستىڭ 75 جىلدىعى قارساڭىندا «Birgemiz» قورىنان ۇلى وتان سوعىسىنىڭ 40 مىڭ قاتىسۋشىسى مەن مۇگەدەگى، سونداي-اق تىل ەڭبەككەرلەرى 50 مىڭ تەڭگەدەن تولەماقى الدى. 800-دەن استام ارداگەر مەن 8 مىڭ تىل ەڭبەككەرىنە ازىق-تۇلىك سەبەتتەرى مەن جەكە قورعانىس قۇرالدارى جەتكىزىلىپ بەرىلدى. ارداگەرلەرىمىزگە قولداۋ كورسەتۋ جۇمىستارى ءارى قاراي دا جالعاسا بەرەدى»، - دەدى پارتيا ءتوراعاسىنىڭ ءبىرىنشى ورىنباسارى.
سونىمەن قاتار، باۋىرجان بايبەك بيىلعى 24 ساۋىردە ەلدىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆ قاۋىپسىزدىك كەڭەسىنىڭ وتىرىسىندا كوروناۆيرۋستان كەيىنگى كەزەڭدە بيزنەسكە، ەڭ الدىمەن شاعىن جانە ورتا بيزنەسكە قولداۋ كورسەتۋگە كۇش سالا وتىرىپ، ەكونوميكانى ساۋىقتىرۋ شارالارىن قولعا الۋدىڭ ماڭىزدىلىعىن اتاپ كورسەتكەنىن تىلگە تيەك ەتتى.
«11 مامىرعا دەيىن ەكونوميكالىق دامۋدى قالپىنا كەلتىرۋ جونىندەگى كەشەندى جوسپار ازىرلەۋ جوسپارلانىپ جاتىر. ۇكىمەت مەملەكەتتىك قولداۋ كورسەتىلەتىن كومپانيالاردىڭ ءتىزىمىن جاساۋعا كىرىستى. پرەزيدەنتتىڭ تاپسىرماسى بويىنشا، بۇعان شىن مانىندە ماڭىزدى جانە جۇيە قۇراۋشى كاسىپورىندار ەنۋى ءتيىس. «Nur Otan» پارتياسى دا وسى جۇمىسقا اتسالىسۋدا. ءبىز، ەڭ الدىمەن، شىعاراتىن ءونىمىنىڭ قۇرامىندا قازاقستاندىق ۇلەسى جوعارى جانە قىزمەتكەرلەرىنىڭ سانى كوپ وڭدەۋشى سالا كاسىپورىندارىنا باسا نازار اۋدارعان ءجون دەپ ەسەپتەيمىز. بۇل رەتتە كاسىپورىندار ءۇشىن «قاراپايىم زاتتار ەكونوميكاسى»، يمپورتقا تاۋەلدىلىكتى ازايتۋ اياسىندا ناقتى نىسانالى كورسەتكىشتەر بەلگىلەنۋى ءتيىس»، - دەدى ول.
سونداي-اق، پرەزيدەنت ءوز مالىمدەمەسىندە ازىق-تۇلىك تاۋارلارىنىڭ جەتكىلىكتىلىگى مەن ساپاسىنا مونيتورينگ جاساۋدىڭ، ەلدىڭ ازىق-تۇلىك قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ كورسەتكەن بولاتىن. وسىعان بايلانىستى «Nur Otan» پارتياسى ءوزىنىڭ وڭىرلىك جانە اۋداندىق فيليالدارىنىڭ جۇمىسىن كۇشەيتەدى.
«جالپى، ازاماتتار مەن بيزنەستى قولداۋعا باعىتتالعان قاراجاتتىڭ كولەمى 6 تريلليون تەڭگەنى قۇرادى. بۇل قاراجاتتى جۇمساۋدىڭ تيىمدىلىگى مەن اشىقتىعى «Nur Otan»-نىڭ تۇراقتى قوعامدىق باقىلاۋىندا بولادى. ەلىمىزدىڭ الدىندا ەكونوميكانى قالپىنا كەلتىرۋ، ازاماتتاردى قالىپتى ومىرگە قايتا ورالتۋ بويىنشا ماڭىزدى جۇمىستار تۇر. «جۇمىلا كوتەرگەن جۇك جەڭىل» دەگەندەي، ءبارىمىز بىرلەسىپ بارشا قيىندىقتاردى ەڭسەرەتىنىمىزگە سەنىمدىمىن. ەلدىڭ جەتەكشى ساياسي كۇشى رەتىندە «Nur Otan» پارتياسى دا ءوزىنىڭ بۇكىل الەۋەتىن وسىعان جۇمىلدىرادى»، - دەدى باۋىرجان بايبەك.
پىكىر قالدىرۋ