الماتى وبلىسىندا تۇرمىسى ناشار وتباسىنىڭ بالاسى مەملەكەتتىك گرانتتان قاعىلعان. ەستەرىڭىزدە بولسا جەرگىلىكتى باسشىلار الماتى وبلىسىنداعى تۇرمىسى ورتادان تومەن وتباسىنىڭ مەكتەپ ءبىتىرۋشى بالاسىنا جوو گرانتىن بەرۋگە ۋادە ەتكەن بولاتىن بۇل تۋرالى قازاقستاندىق ب ا ق از جازباعان.  ەندى مىنە،  قۇزىرلىلار «وتباسىڭنىڭ كىرىسى ەڭ تومەنگى كۇنكورىس مولشەرىنەن 10 دوللار اسىپ كەتكەندىكتەن، گرانت بەرىلمەيدى» دەپ مالىمدەگەن ەكەن. بۇل تۋرالى «قامشى» پورتالى ازاتتىققا سىلتەمە جاساي وتىرىپ حابارلايدى.

الماتى وبلىسىنداعى مويناق كەنتىندە تۇراتىن رىسبەك دوساننىڭ جاسى 17-دە. وتباسىلىق تابىستارى  ەدەن جۋۋشى اناسىنىڭ ايىنا الاتىن 26 مىڭ تەڭگەسى ()شامامەن 140 دوللار) مەن جارتىلاي جەتىمدەرگە مەملەكەتتەن بولىنەتىن 24 مىڭ تەڭگە (130 دوللار).

بيىل كوكتەمدە رىسبەك تۇرمىسى ناشار وتباسىدان شىققان بالا رەتىندە وبلىس اكىمى قولىنان ۇلتتىق ءبىرىڭعاي تەستىلەۋدەن جوعارى بالل السا، تەگىن وقۋعا كەپىلدىك بەرەتىن اتاۋلى سەرتيفيكات العان.  ۇلتتىق ءبىرىڭعاي تەستىلەۋ اياقتالىپ، 83 بالل جيناعان رىسبەككە  اكىمدىكتەگىلەر ەندى گرانت بەرىلمەيتىنىن جەتكىزگەن. سەبەبى وتباسىنىڭ كۇندىك تابىسى 10 دوللاردان اسىپ كەتكەن- مىس.

ال انا بايعۇس كىنانى اكىمدىكتەن ەمەس، وزىنەن ىزدەيدى. ونىڭ ايتۋىنشا ءناۋرىز-ساۋىر ايلارىندا جۇمىستاعى ارىپتەسىنىڭ ورنىنا بىرنەشە مارتە شىعىپ، ءناپاقاسىن ەسەلەپ الىپتى. سونداعى تاپقانى 2000 تەڭگە. ال زاڭ بويىنشا بۇل 10 دوللاردان اسىپ كەتەدى. وسىلايشا سىنىقتان سىلتاۋ تاپقان اكىمدىكتەگىلەر جاس تالاپكەردىڭ ساعىن سىندىراتىن شەشىمگە كەلگەن.

الماتى وبلىسى ءبىلىم دەپارتامەنتى ماماندارى رىسبەك دوساننىڭ وتباسىنىڭ قيىن جاعدايىن تۇسىنەتىنىن ايتىپ، ءبىراق زاڭ تالابىن بۇزا المايتىن، ەرەجەنى قاتاڭ ورىنداۋعا مىندەتتى ەكەنىن مالىمدەگەن.

الماتى وبلىسى ءبىلىم دەپارتامەنتىنىڭ ءبولىم باستىعى بولاتبەك دارىبايەۆ:

— بۇل سەرتيفيكاتتار وقۋشىلار جاقسى وقىسىن، ەمتيحانعا دۇرىستاپ دايىندالسىن دەگەن ويمەن ستيمۋل رەتىندە بەرىلگەن. ەڭ باستى تالاپ - تۇرمىسى ناشار وتباسى بولۋى شارت. رىسبەك دوسانعا اتاۋلى سەرتيفيكات بەرگەن كەزدە ونىڭ وتباسىنىڭ تۇرمىسى ناشار سانالعان. ءبىراق كەيىن كىرىسىن قوسىمشا تەكسەرگەن كەزدە ونىڭ وتباسىنىڭ كىرىس كولەمى ەڭ تومەنگى كۇنكورىس مولشەرىنەن اسىپ كەتكەنى انىقتالدى، - دەيدى.

ال  وبلىس اكىمىنىڭ ورىنباسارى باحتيار ونەربايەۆ مىرزا رىسبەك دوسان سياقتى بالالارعا قاتىستى جاعدايدى «جەكە باقىلاۋىنا» الاتىنىن ايتقان.

نۇرزات توعجان