جاقىندا رەسەيدىڭ ومبى گۋبەرنياسىندا تۇراتىن ەتنيكالىق قازاقتار مەن قالا تۇرعىندارى ومبى قالاسىنىڭ 299-شى تۋعان كۇنى مەن شوقان ءۋاليحانوۆتىڭ 180 جىلدىعىن تويلادى. 

عالىمنىڭ اتىنا بەرىلگەن كوشەدە مەرەكەلىك ءىس-شارالار ۇيىمداستىرىلىپ، «ەتنو-جاز» شىعارماشىلىق جوباسى، «دوستىق جاعالاۋى» ۇلتتىق مادەني مەرەكەسى مەن

ش. ءۋاليحانوۆتىڭ 180 جىلدىعىنا ارناپ «ۇلى دالانىڭ سوڭعى حانزاداسى» ەكسكۋرسياسى وتكىزىلدى. بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.

 «ومبى قازاقتارى» قاۋىمداستىعىنىڭ وكىلى تورعىن اشەنوۆانىڭ ايتۋىنشا، «دوستىق جاعالاۋى» شاراسىنا 40-قا جۋىق ۇلتتىق-مادەني ۇيىمىنىڭ وكىلدەرى قاتىسقان. قاتىسۋشىلار قالا تۇرعىندارى مەن قوناقتارىن ومبىدا ءومىر ءسۇرىپ جاتقان ءتۇرلى ۇلت وكىلدەرىنىڭ سالت- داستۇرىمەن، مادەنيەتىمەن تانىستىرعان.

مەرەكەگە وراي اقشاڭقاي قازاقتىڭ كيىز ءۇيى تىگىلىپ، ول جەردە قازاقتىڭ ۇلتتىق تاعامدارى تانىستىرىلعان

كيىز ۇيدە ومبى وبلىسىنىڭ ۇلت وكىلدەرىنىڭ ۇلتتىق-مادەني ۇيىمدارى، «شوقان جولى» ايماقتىق قوعامدىق ۇيىمى، «ومبى قازاقتارى»  قاۋىمداستىعىنىڭ وكىلدەرى قالا مەرى ۆياچەسلاۆ دۆوراكوۆسكيي مەن قازاقستاننان اتالمىش شاراعا ارنايى كەلگەن قوناقتاردى قارسى العان.

 «مەن بۇل جەردە ومبىنىڭ ناعىز دوستارىن كورىپ وتىرمىن. ءبىزدىڭ قالامىزدىڭ ەسىگى قاشاندا سىزدەرگە اشىق. ءبىز سىزدەرمەن ىنتىماقتاستىعىمىزدى ودان ءارى دامىتۋعا نيەتتىمىز»، - دەگەن قالا مەرى ۆ. دۆوراكوۆسكيي الاڭعا جينالعان جۇرتتى قالا كۇنىمەن قۇتتىقتاپ كەلگەن قوناقتارعا العىسىن بىلدىرگەن.

مەرەكەلىك شارالار قازاقستان رەسپۋبليكاسىنىڭ كونسۋلدىعىنىڭ قاسىندا «ۇلى دالانىڭ پەرزەنتتەرى» ادەبي-مۋزىكالىق كەشىمەن جالعاستى.

نۇرزات توعجان

سۋرەتتەر: قازاقپارات