جىل باسىنان بەرى تۇركياعا دەمالۋعا بارعان 12 قازاقستاندىق انتاليادا قازا بولعان. بۇل تۋرالى استانادا وتكەن بريفينگتە  ءسىم رەسمي وكىلى التاي ابيبۋللايەۆ مالىمدەدى، دەپ حابارلايدى «قامشى» پورتالى.

ەستەرىڭىزدە بولسا، تۇركياداعى اپاتقا ۇشىراعان اۆتوبۋستا 7 قازاقستاندىقتىڭ بولعانى تۋرالى ب ا ق جازعان بولاتىن. بەلگىلى بولعانداي، جول كولىك اپاتىنان قازا تاپقان ەكى ادامنىڭ ءبىرى 19 جاسار قازاقستاندىق قىز بولىپ شىققان.

ءسىم وكىلى ابيبۋللايەۆتىڭ ايتۋىنشا، جول اپاتى ورىن العان   اتالمىش تاس جول تۇركياداعى ءقاۋىپتى جولداردىڭ ءبىرى بولىپ سانالادى ەكەن.

«ءبىراز ۋاقىت بۇرىن وسى كۇرە جولدا («پامۋككالە-انتاليا» – اگەنتتىك) جول-كولىك وقيعاسىنان   ءبىزدىڭ ازامات كونستانتين يۆانوۆ قازا بولعان ەدى، بۇل تاس جول تۋريستەر ءۇشىن ءقاۋىپتى سانالادى. ءبىزدىڭ كونسۋلدىق قىزمەتكەرلەرى بارلىق قاجەتتى كومەكتى كورسەتۋ ءۇشىن ۇنەمى بەلسەندى  تۇردە جۇمىس ىستەيدى»، – دەدى ول.

ءسىم مالىمەتىنە سۇيەنسەك، جىل باسىنان بەرى انتاليادا قازاقستاننىڭ 12 ازاماتى: ۇشەۋى جول اپاتىنان، 9-ى دەنساۋلىعى ناشارلاۋ سالدارىنان قازا بولعان.

نۇرزات توعجان