2015-2016 وقۋ جىلىن اياقتاعان تۇلەكتەر مەن اتا-انالار ءۇشىن تاعاتسىزدانا كۇتكەن «مەملەكەتتىك ءبىلىم گرانتتارىنىڭ» تولىق ءتىزىمى 11 تامىز كۇنى جاريالاناتىن بولادى دەپ مالىمدەدى ق ر ءبىلىم جانە عىلىم مينيسترلىگى. ال «قامشى» پورتالى ءوز وقىرماندارىنا مۇنداي يگى جاڭالىقتى العاشقىلاردىڭ ءبىرى بولىپ ۇسىناتىنىن حابارلايدى.

ايتا كەتەيىك، بيىلعى جىلعى تالاپكەرلەردىڭ اراسىنداعى ۇلكەن كونكۋرس «حالىقارالىق قاتىناستار» ماماندىعى بويىنشا جۇرگىزىلگەن. اتالمىش ماماندىق بويىنشا 1 ورىنعا 32 ۇمىتكەر تالاسقان. دەنساۋلىق ساقتاۋ سالاسى ماماندىعى بويىنشا 1 ورىنعا 18 ادام ۇمىتكەر بولسا، قارجى سالاسى، ەكونوميكا سالالارىنا 15 ادامنان تالاسقان. سونداي-اق، بيىلعى تالاپكەرلەردىڭ ەڭ كوپ تاڭداعان ماماندىقتارىنىڭ قاتارىنا قۇقىقتانۋ، قۇقىق سالاسى دا كىرگەن. بۇل ماماندىق بويىنشا ءبىر ورىنعا 14 ادامنان كەلگەن.

ەستەرىڭىزدە بولسا، 2015-2016 جىلعى تالاپكەرلەر ءۇشىن مەملەكەتتىك ءبىلىم گرانتتارىن تاعايىنداۋ جونىندەگى رەسپۋبليكالىق كونكۋرس كوميسسياسى ءوز جۇمىسىن 5 تامىز كۇنى باستاپ كەتكەن. ال ق ر ءبىلىم جانە عىلىم ءمينيسترى اسلان ءسارىنجىپوۆ مىرزا بيىلعى جىلى جوو بەرىلەتىن گرانتتار مولشەرىن جاريالاعان ەدى.

مينيستر مىرزانىڭ سوزدەرىنە سۇيەنسەك، بيىلعى جىلى تالاپكەرلەرگە  32 168 ءبىلىم گرانتى بولىنەدى. بيىلعى جىلعى ۇبت ناتيجەسى جوعارعى كورسەتكىشكە جەتكەنىن ەسكەرە كەلە مينيسترلىكتەگىلەر كونكۋرسقا 67 377 ادام قاتىساتىنىن ايتقان.  32 مىڭ گرانتتىڭ 12،5 مىڭى تەحنيكالىق ماماندىقتارعا تيەسىلى بولسا،  6 مىڭعا جۋىعى پەداگوگيكالىق ماماندىقتار ۇلەسىنە تيەسىلى. ال 3 مىڭعا جۋىق ءبىلىم گرانتى اۋىلشارۋاشىلىق ماماندىقتارعا تابىستالاتىن بولادى.

ال بيىلعى جىلعى ءبىلىم گرانتتارى يەگەرلەرىنىڭ تولىق ءتىزىمىن «قامشى» پورتالى ءوز وقىرماندارىنا 11 تامىز كۇنى ۇسىناتىن بولادى.

نۇرزات توعجان

«قامشى»  سىلتەيدى