تەمىرتاۋلىقتار تامىزدىڭ العاشقى اپتاسىن قالاعا جاڭا اكىمدى تاعايىنداۋمەن تۇيىندەدى.  وسىلايشا قاراعاندى وبلىسىنىڭ اپپاراتىندا جاڭا كادرلىق تاعايىنداۋلار بولدى. ق ر پرەزيدەنت اكىمشىلىگىنىڭ كەلىسىمى جانە قاراعاندى وبلىستىق ءماسليحات دەپۋتاتتارىنىڭ ماقۇلداۋىمەن تەمىرتاۋ قالاسىنا عالىم ءاشىموۆ مىرزا اكىم  بولىپ تاعايىندالدى. ال جاپ-جاڭا اكىمدى قالا اكتيۆىنە وبلىس باسشىسى نۇرمۇحامبەت ابدىبەكوۆ تانىستىرعان. بۇل تۋرالى «Qamshy.kz» سايتى egemen.kz-كە سىلتەمە جاساي وتىرىپ حابارلادى.

عالىم ءاشىموۆ 1968 جىلى تۋعان. 2000 جىلى بايقوڭىروۆ اتىنداعى جەزقازعان مەملەكەتتىك ۋنيۆەرسيتەتىن ەكونوميست-مەنەدجەر ماماندىعى بويىنشا ءبىتىردى. ءار جىلداردا قاراعاندى وبلىسىنداعى جايرەم اۋىلى مەن قاراجال قالاسىنىڭ اكىمى بولىپ قىزمەت اتقاردى. سونداي-اق، وبلىس اكىمىنىڭ اپپاراتى مەن وبلىستىق ونەركاسىپ جانە يندۋستريالدى-يننوۆاسيالىق دامۋ باسقارماسىن باسقاردى. تەمىرتاۋ قالاسىنىڭ باسشىسى بولىپ تاعايىندالعانعا دەيىن وبلىس اكىمىنىڭ اۋىل شارۋاشىلىعى ماسەلەلەرى جونىندەگى ورىنباسارى بولىپ ەڭبەك ەتتى. ال بۇگىنگە دەيىن تەمىرتاۋدى بەس جىل باسقارىپ كەلگەن نۇركەن سۇلتانوۆ وبلىس اكىمىنىڭ كەڭەسشىسى بولىپ تاعايىندالدى.

نۇرزات توعجان

«قامشى» سىلتەيدى