بيلىكتەگى باس پارتيا (نۇر وتان) ءوزىنىڭ 2014 جىلعى كىرىس-شىعىسى تۋرالى ەسەپ بەردى. پارتيانىڭ رەسمي سايتىندا كورسەتىلگەندەي، باس پارتيانىڭ بىلتىرعى بيۋدجەتى  7 ميلليارد 954 ميلليون تەڭگەنى قۇراعان. بۇل تۋرالى «قامشى» پورتالى «ازاتتىققا» سىلتەمە جاساي وتىرىپ حابارلايدى.

جوعارىداعى كورسەتىلگەن سومانىڭ  7،1 ميلليارد تەڭگەگە جۋىعى كوممەرسيالىق ەمەس كوزدەردەن تۇسسە، 763 ميلليونعا جۋىق تەڭگە كوممەرسيالىق جولمەن كەلگەن پايدا ەسەبىنە تىركەلگەن.

رەسمي اقپاراتتا، پارتيانىڭ كىرىسى مۇشەلىك جارنالاردان، رەسپۋبليكالىق بيۋدجەتتەن بولىنگەن قارجىدان، كاسىپكەرلىك قىزمەت پەن ەكىنشى دەڭگەيلى بانكتەردەگى سالىمداردان الىنعان كىرىستەر، قازاقستان ازاماتتارى مەن ۇيىمدارى بەرگەن ەرىكتى قارجىلار جانە باسقا كوزدەردەن قۇرالاعانى ايتىلعان.

پارتيا مۇشەلەرى جارناسى 1 ميلليارد 349 ميلليون تەڭگەنى قۇراسا، رەسپۋبليكالىق بيۋدجەتتەن پارتياعا 3 ميلليارد 367 ميليون تەڭگە بولىنگەن.

بيلەۋشى پارتيانىڭ تولىق مەنشىگىندە ەكى كوممەرسيالىق ۇيىم – «نۇر وتان» شارۋاشىلىق باسقارماسى» (حوزۋ) جاۋاپكەرشىلىگى شەكتەۋلى سەرىكتەستىگى جانە «نۇر مەديا» حولدينگى بار. بىلتىرعى جىلى كاسىپكەرلىك جانە جالعا بەرۋ قىزمەتىنەن پارتيا 735 ميلليون 565 مىڭ تەڭگە تابىس تاۋىپتى.

وتكەن جىلى پارتيانىڭ شىعىنى 5،4 ميلليارد تەڭگەدەن اسا سومانى قۇراعان.

2014 جىلعى 31 جەلتوقسانداعى ەسەپ بويىنشا، «نۇر وتان» پارتياسىنا 849 مىڭ 674 ادام مۇشە بولسا، پارتيانىڭ جاستار قاناتى - «جاس وتان» قاتارىندا 164 مىڭ 115 ادام بار دەپ كورسەتىلگەن.

نۇرزات توعجان