بۇگىن الماتى قالاسى ناۋرىزباي اۋدانىنىڭ قالقامان-2 ىقشاماۋدانىندا حيميا-بيولوگيا باعىتىندا وقىتاتىن نازاربايەۆ زياتكەرلىك مەكتەبى اشىلدى. بۇل - كولەمى جاعىنان ەلىمىز بويىنشا ەڭ ۇلكەن مەكتەپ بولىپ تابىلادى. بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.

سالتاناتتى اشىلۋ راسىمىنە الماتى قالاسىنىڭ جاڭا اكىمى باۋىرجان بايبەك، بەلگىلى عالىمدار، ساياسات جانە قوعام قايراتكەرلەرى، پەداگوگتەر، وقۋشىلار جانە اتا-انالار قاتىستى.

«قازاقتا «ەل بولام دەسەڭ، بەسىگىڭدى تۇزە» دەگەن جاقسى ءسوز بار. سوندىقتان دا ەلباسى نۇرسۇلتان نازاربايەۆ تاۋەلسىزدىكتىڭ  العاشقى جىلدارىنان باستاپ، ءبىلىم سالاسىنا ۇلكەن ءمان بەردى. «بولاشاق» باعدارلاماسىن قۇردى. سول باعدارلاما بۇگىندە ءوز جەمىسىن بەرۋدە. سوندىقتان، ەلباسىمىز سەكىلدى ەشتەڭەدەن قورىقپاۋ كەرەك. ادامنىڭ قولىنان كوپ نارسە كەلەدى. ەڭ باستىسى، شىن نيەت، ىنتا-ىقىلاس، ءبىلىم جانە جىگەر قاجەت. ەستەرىڭىزدە بولسىن، ءبىلىم - بۇل جاقسى. ءبىراق، تاربيەسىز ول ناتيجە بەرمەيدى. ياعني، وتانىن شىن سۇيگەن پاتريوتتى، مادەنيەتتى، تاربيەلى جانە ءبىلىمدى ازامات بولىڭىزدار. ەلباسىنىڭ ساياساتىن ءارى قاراي جالعاستىراتىن سىزدەرسىزدەر»، - دەدى ءوز سوزىندە الماتى قالاسىنىڭ اكىمى باۋىرجان بايبەك.

ايتا كەتەلىك، رەسپۋبليكامىزدا نازاربايەۆ زياتكەرلىك مەكتەپتەرىنىڭ اشىلۋى ەلباسىنىڭ باستاماسىمەن «20 زياتكەرلىك مەكتەپ» اتتى مەملەكەتتىك باعدارلاما اياسىندا جۇزەگە اسىرىلىپ كەلەدى. العاشقى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبى 2009 جىلى استانا قالاسىندا اشىلعان بولاتىن. قازىرگى تاڭدا ەلىمىزدە 18 مەكتەپ جۇمىس ىستەيدى.

نۇرزات توعجان