كۇنى كەشە عانا الماتى قالاسىنا اكىم بولىپ تاعايىندالعان باس پارتيانىڭ ەكس-توراعاسى باۋىرجان بايبەككە قاتىستى قازاقستاندىق ساياساتكەرلەر ءوز پىكىرلەرىن بىلدىرگەن. بۇل تۋرالى «قامشى» پورتالى  Tengrinews.kz-كە سىلتەمە جاساي وتىرىپ حابارلايدى.

"التەرناتيۆا" وزەكتى زەرتتەۋلەر ورتالىعىنىڭ ديرەكتورى اندرەي چەبوتاريەۆ ەلباسى بايبەككە ۇلكەن سەنىم ارتقانى دەپ باعالاسا،  "تاۋەكەلدى باعالاۋ توبىنىڭ" ديرەكتورى دوسىم ساتپايەۆ بۇل تاعايىنداۋدى وزگەشە ءبىر «ەكسپەريمەنت» دەپ ەسەپتەيدى. ساراپشىلار ءوز ويلارىن Tengrinews.kz تىلشىسىنە بەرگەن سۇحباتتارى بارىسىندا جەتكىزگەن.

"بايبەككە قاتىستى ايتاتىن بولساق - بۇل وتە قىزىق ەكسپەريمەنت، سەبەبى مەنىڭ ويىمشا، الماتى قالاسىن شارۋاشىلىقتا تاجىريبەسى جوق ادام ءبىرىنشى رەت باسقارىپ تۇر. سوندىقتان مەن الەۋمەتتىك جەلىدە الماتى - "نۇر وتان" ەمەس، بۇل جەردە سوزگە ەمەس، ىسكە سەنەدى دەپ قالجىڭدادىم. مەنىڭ ويىمشا، بۇل راسىندا دا بايبەكتىڭ ءوزى ءۇشىن سالماقتى سىناق بولادى، ول كۇز-قىس كەزەڭى قارساڭىندا تاعايىندالدى، بۇل كەزەڭ ءبىزدىڭ شاھار ءۇشىن اۋىر جانە سالماقتى كەزەڭ. ال احمەتجان ەسىموۆتىڭ كومانداسىندا جاقسى باسقارۋشىلار جەتەرلىك. ەندى كوپ نارسە باۋىرجان بايبەكتىڭ كومانداسىنا تىكەلەي بايلانىستى بولماق"، - دەيدى دوسىم ساتپايەۆ.

"مەنىڭ ويىمشا، وعان ءقازىر تولىقتاي كادرلىق تازالاۋ جۇرگىزۋدىڭ قاجەتى جوق. قالاي دەسەك تە - الماتى وتە كۇردەلى كوممۋنالدىق شارۋاشىلىق، بۇل جەردىڭ ينفراقۇرىلىمى دا كۇردەلى، ناقتى ءارى الەۋەتتى پروبلەمالار جەتەرلىك. سوندىقتان ول ءوزى ءتۇسىنىپ، ءبىز دە - الماتىلىقتار ودان نە كۇتەتىنىمىزدى ءتۇسىنىپ العانعا دەيىن بايبەككە سىناق مەرزىمىن بەرۋ كەرەك. سەبەبى بايبەك شىن مانىندە ءوزى ءۇشىن عانا ەمەس، بۇكىل بولاشاقتىقتار ءۇشىن جاۋاپكەرشىلىكتى ءوز موينىنا الايىن دەپ تۇر"، - دەدى ساراپشى، سونىمەن قاتار، ول مەملەكەت باسشىسىنىڭ الماتى اكىمى ەتىپ باۋىرجان بايبەكتى تاعايىنداۋ ارقىلى ءوز جولىن جاستارعا بەرگەنىن كورسەتتى دەپ، نازار اۋدارتتى.

"جاستار وزدەرىن قانداي دا ءبىر پارتيالىق قۇرىلىمدا، جىلى ورىندا وتىرىپ، وزدەرىن كورسەتىپ قانا قويماي، باسقارۋشى ءارى شارۋا ادامى رەتىندەگى ءوز قابىلەتتەرىن كورسەتۋ ءۇشىن جاس ماماندارعا مۇمكىندىك بەرىلىپ وتىر. الماتى دەگەنىمىز - مەملەكەت ىشىندەگى مەملەكەت ەمەس پە، بۇل جەردە راسىمەن-اق پروبلەما جەتەرلىك، ولاردى جىلدام ءارى شاپشاڭ تۇردە شەشۋ كەرەك، سوڭعى سەل كورسەتىپ بەرگەندەي، بۇل جەردە قالانىڭ قاۋىپسىزدىگىنە بايلانىستى بەلگىلى ءبىر اياقسىز ىستەر بار"، - دەپ ەسەپتەيدى ساتپايەۆ.

"ءقازىر بايبەكتەن كوپ نارسە كۇتىلىپ وتىر جانە ءداستۇر بويىنشا بەرىلەتىن 100 كۇندىك سىناق مەرزىمى بارلىعىنىڭ نەگە اكەپ سوعاتىنىن كورسەتەدى"، - دەدى ساتپايەۆ جانە ول باۋىرجان بايبەكتىڭ الماتى اكىمى لاۋازىمىنداعى كەلەشەگىنە ەلۋ دە ەلۋ دەگەن باعا بەردى.

ال ەكىنشى ساراپشى - اندرەي چەبوتاريەۆ بايبەكتىڭ تاعايىندالۋىنا بايلانىستى ءوز دەربەستىگىن تەكسەرەدى دەگەن باعا بەردى. "باۋىرجان بايبەكتىڭ الماتى قالاسىنىڭ اكىمى بولىپ تاعايىندالۋىنا بايلانىستى ايتاتىن بولساق - بۇل زور سەنىمنىڭ كورسەتكىشى، سەبەبى ول ءوزىن رەسپۋبليكالىق دەڭگەيدە كورسەتە ءبىلدى. جانجالدار اراسىندا كورىنگەن جوق. ەندى وعان ماڭىزدى لاۋازىم تاپسىرىلدى، ءتىپتى دەربەس جۇمىس دەۋگە بولادى. سەبەبى مەنىڭ ويىمشا، ورتالىق دەڭگەيدە جۇمىس ىستەپ جۇرسەڭ بەلگىلى ءبىر سۇيەنىشىڭ بولادى. بايبەك ءۇشىن بۇل جاقسى تاجىريبە، ول بۇعان دەيىن ايماقتا جۇمىس ىستەگەن جوق"، - دەيدى چەبوتاريەۆ.

نۇرزات توعجان