قازاقستان دەنساۋلىق ساقتاۋ ءمينيسترى الەكسەي سوي حالىقتىڭ ءبارىن پتر-تەستىدەن وتكىزۋ تۋرالى جوسپار جوعىن ايتتى. بۇل تۋرالى ول بۇگىن ورتالىق كوممۋنيكاسيالار قىزمەتىندە وتكەن بريفينگتە مالىمدەدى. 

– جالپى ءبىزدىڭ ستاتيستيكا كوروناۆيرۋس ينفەكسياسى بويىنشا پتر-تەستىلەر ارقىلى راستالعان رەسمي مالىمەتتەرگە نەگىزدەلگەن. البەتتە ۆيرۋستى جۇقتىرۋ جاعدايى كوپ بولۋى مۇمكىن. قولداعى رەسۋرستاردى پايدالانۋ ءۇشىن پتر-تەستىلەرگە باسىمدىق بەرىلەدى، – دەدى دەنساۋلىق ساقتاۋ ءمينيسترى الەكسەي سوي.

بۇعان قوسا، ۆەدومستۆو باسشىسى اۋرۋ بەلگىلەرى بولماعان جاعدايدا پاسيەنت ۇيىندە 14 كۇن باقىلاۋدا بولاتىنىن، ەڭ ءبىرىنشى كەزەكتە كومەككە مۇقتاج ادامدارعا باسىمدىق بەرەتىنىن ايتتى.

– پاسيەنت جۇقتىرعان توپقا جاتا ما، جوق الدە ول پنيەۆمونيا ما – ونى قالاي اجىراتۋعا بولادى؟ بىزگە ەڭ الدىمەن ماقساتتى توپتاردى تەستىدەن وتكىزگەن دۇرىس؟ سەبەبى، ەگەر اۋرۋ بەلگىلەرى بولماسا، پاسيەنت ۇيىندە 14 كۇن جاتىپ، باقىلاۋدا بولا الادى. ياعني ءبىز ەڭ ءبىرىنشى كەزەكتە، كومەككە مۇقتاج ادامدارعا باسىمدىق بەرىپ وتىرمىز، – دەدى مينيستر.

سوڭعى رەسمي اقپاراتقا ساي، قازاقستاندا كوروناۆيرۋس جۇقتىرعاندار سانى 49 مىڭنان اسقان.  ولاردىڭ 264ء-ى كوز جۇمدى. ءقازىر قازاقستان دۇنيەجۇزى بويىنشا ۆيرۋس جۇقتىرعاندار جونىنەن 34-ورىندا تۇر.