اتىراۋ وبلىسىنىڭ تۇرعىنى، جۋرناليست تاۋىربەك بوزەكەن الەۋمەتتىك جەلىدەگى پاراقشاسىندا اتىراۋدى ۋلاپ جاتقان ءۇش وشاق تۋرالى جازدى.
"ءوز بوعىن ءوزى جەگەن اتىراۋ.
⠀
بۇگىن اتىراۋ وبلىسى ەكولوگيا دەپارتامەنتى باسشىسىنىڭ مىندەتىن اتقارۋشى ەرلان جادىگەر ۇلى، تابيعي رەسۋرستار جانە تابيعاتتى پايدالانۋدى رەتتەۋ باسقارما باسشىسىنىڭ ورىنباسىرى نۇرگۇل سۇگىرباي قىزى، سونداي اق ارنايى ەكولوگ ماماندارمەن بىرلەسىپ اتىراۋدىڭ اۋاسىن تەكسەرىپ قايتتىق. ارنايى جۇمىستار كەشكى 11:00-دەن تۇنگى ساعات 3:00-گە دەيىن سوزىلدى.
⠀
بىردەن ايتايىن! اتىراۋ قالاسى ءولىم اۋزىندا تۇر. بۇل جەردە كىنا، ەكولوگتاردا ەمەس ەكەن. بۇگىن سوعان، ناقتى كوزىم جەتتى. ولار دا مەن سياقتى "اتىراۋىم..." دەپ شىرىلداپ جۇرگەن جاندار. كەرەك دەسەڭىز "تاۋىربەك ءجۇر! كوزىڭمەن كورشى، جازشى وسىنى..." دەپ مەنى جەتەكتەپ الىپ شىقتى. ولاردىڭ دا قولى بايلاۋلى. ماسەلە باسقادا. ونى ايتپاسا دا بەلگىلى.
قالانى ۋلاپ جاتقان نەگىزگى ءۇش وشاق بار.
⠀
ءبىرىنشى! ارينە، مۇناي كومپانيالارى. دەپارتامەنت ءوندىرىس ورىندارىنا تەك ايىپپۇل سالۋمەن عانا شەكتەلىپ ءجۇر. ال ولارعا اقشانى تولەپ تاستاۋ 5 سەكۋند. ەكولوگتار "ءبىز ولاردىڭ جۇمىسىن توقتاتا الماي جاتىرمىز!" دەيدى. ويتكەنى قازاقستاننىڭ اۋزىنا سۋ تامىزىپ وتىرعان وسىلار. ءبىراق تۇندە بىلدىرتپەي تۇنشىقتىرىپ جاتىر. سوڭعى ۋاقىتتا اۋانى لاستاۋشىلاردى قولعا ءتۇسىرۋ ءتىپتى قيىنداپ كەتكەن. زاڭ نورماسىنا سايكەس ەكولوگتار مۇناي كومپانيالارىنا بىرنەشە كۇن بۇرىن "ءبىز سىزدەردى تەكسەرۋگە بارامىز!" دەپ حات جىبەرۋ كەرەك ەكەن. وعان جاۋاپ الىپ، تەكسەرۋگە جەتەم دەگەنشە كومپانيا وكىلدەرى اينالاسىن جىلان جالاعانداي ەتىپ قويادى. ال ەكولوگتاردىڭ ءوندىرىس وشاعىنا باسا-كوكتەپ كىرىپ بارۋعا قۇزىرەتتىلىگى جەتپەيدى. مىنە، ماسەلە قايدا جاتىر؟! ءقازىر مۇنايلى ايماقتا ءبىرىنشى ساناتتاعى ءقاۋىپتى كاسىپورىندار سانى 147-دەن اسقانىن، تاعى ۇمىتپاڭىز!⠀
ەكىنشى. قالادان شىققان تۇرمىستىق قالدىقتاردى كومۋگە ارنالعان پوليگون. وتكەن عاسىردىڭ 70ء-شى جىلدارى قۇرىلعان پوليگون ەكولوگيالىق تالاپتارعا مۇلدە ساي ەمەس. تۇنگى ساعات ەكىلەر شاماسىندا قاسىنا باردىق. ىستىڭ ءيىسى تۇرعىزبادى. ول ءيىس جەلدىڭ ىقپالىمەن قالاعا بارىپ تۇنادى. ال ونىڭ قۇرامىنداعى كۇكىرتسۋتەگى ادەتتەگى نورمادان 100 ەسە كوپ. (سەنبەسەڭىز، تومەندەگى ۆيدەونى كورىڭىز) ءقازىر قالاعا جاڭا پوليگون كەرەك. ول ەلدى-مەكەننەن الىس جەرگە سالىنۋى ءتيىس. وبلىستىق اكىمدىك وسىمەن جۇمىستانىپ جاتىر ەكەن. ءبىراق ول قاشان، قاي ۋاقىتتا بىتەدى، بەلگىسىز. "ازىرگە شىدامدىلىق تانىتىپ، ءولىپ قالماي كۇكىرتتى جۇتا تۇرىڭدار" دەيدى.⠀
ءۇشىنشى. قالانىڭ ەكى جاق شەتىندە ورنالاسقان قالدىق سۋلاردى توگەتىن بۋلانۋ الاڭى. بۇرىن كارىز سۋى بۋلانۋ الاڭىنا جەتكەنشە تازارتۋدىڭ تولىق ساتىسىنان وتپەيتىن ەدى. ءقازىر مۇلدە وتپەيدى ەكەن. ياعني، ۇيىڭىزدەن شىققان قالدىق سۋ (بوق سۋ) بۋلانۋ الاڭىنا بارىپ تاپ سولايىمەن توگىلەدى. ودان بولىنگەن ساسىق ءيىس، كۇكىرتسۋتەگى قالاعا كەلەدى. ءسىز ونى جۇتاسىز. "ءوز بوعىن ءوزى جەگەن" دەگەن ءسوز بىزگە قاراتا ايتىلعان عوي. ەحح... ال قالاداعى بۋلانۋ الاڭى 1978 جىلى سالىنىپ، سودان بەرى بىردە ءبىر رەت كۇردەلى جوندەۋدەن وتپەگەن ەكەن.⠀
مىنە، "اقشاسى كوپ، ۋايىمى جوق، قارىنى توق" دەپ ويلاپ جۇرگەن اتىراۋدىڭ سىيقى وسى" دەلىنگەن جازبادا.
