شىمكەنتتەگى چاپايەۆ ەلدىمەكەنىندە سوڭعى ەكى كۇندە ەكى رەت جارىلىس بولدى. قۇقىق قورعاۋشىلار جارىلىستار سالدارىنان ەكى تۇرعىننىڭ اياعىن ءبىرىنشى دارەجەلى كۇيىك شالعانىن ايتادى. بۇل تۋرالى «قامشى» پورتالى ازاتتىققا سىلتەمە جاساي وتىرىپ حابارلايدى.

تامىزدىڭ 12ء-سى جانە 13ء-ى كۇندەرى شىمكەنت قالاسىنا قاراستى چاپايەۆ ەلدىمەكەنىندە ەكى رەت جارىلىس بولدى. بۇل وقيعالاردىڭ كەسىرىنەن العاشقى كۇنى - 11 جاسار وقۋشى قىز، ەكىنشى كۇنى 39 جاستاعى ازاماتتىڭ اياعىن كۇيىك شالعان.

العاشقى جارىلىس  تامىزدىڭ 12ء-سى كۇنى بولعان. وقيعا كۋاگەرى، جارىلىستان زارداپ شەككەن ءفاريدانىڭ قۇربىسىنىڭ ايتۋىنشا، تۇسكى ساعات 12:30-دار شاماسىندا دۇكەنگە كەتىپ بارا جاتىپ، ابايسىزدا جارىلعىش زاتتى باسىپ كەتكەن. وسىدان كەيىن  اياعىن كۇيىك شالعان فاريدانىڭ اناسى بۇل وقيعا تۋرالى قانداي دا ءبىر پىكىر ايتۋدان باس تارتقان. . ال ولاردىڭ كورشىلەرىنىڭ سوزىنشە، جارىلىس بولعان ساتتە «قاتتى دىبىس شىققان». جارىلىس بولعان پريۆولنايا كوشەسىنىڭ تۇرعىنى ۆەرا نيكولايەۆا «قاتتى دىبىستى ەستىگەندە گاز بالونى جارىلدى دەپ ويلاعان».  

ال تامىزدىڭ 13ء-ى كۇنى ساعات كۇندىزگى 11:30-دار شاماسىندا چاپايەۆ ەلدى-مەكەنىندەگى كرجيجانوۆسكيي اتىنداعى كوشەدە تاعى جارىلىس بولعان. ول جولى 39 جاستاعى ەكىنشى توپتاعى مۇگەدەك ازامات زارداپ شەككەن.

وڭتۇستىك قازاقستان وبلىستىق ىشكى ىستەر دەپارتامەنتىنىڭ (ءىىد) باسپا ءسوز حاتشىسى سالتانات قاراكوزوۆا شىمكەنتتەگى چاپايەۆ ەلدىمەكەنىندە سوڭعى ەكى كۇندە قاتارىنان ەكى جارىلىستىڭ بولعانىن راستاعان.

تامىزدىڭ 12ء-سى كۇنى وقيعا ورنىنا (چاپايەۆ ەلدىمەكەنى – رەد.) بارعان پوليسيا قىزمەتكەرلەرىنىڭ انىقتاعانى - 11 جاسار وقۋشى قىز كورشى ءۇي جانىنان ءوتىپ بارا جاتىپ، پاكەتتەگى قولدان جاسالعان جارىلعىش زاتتى باسىپ كەتكەن. سول اياعىنىڭ تابانىن ءبىرىنشى دارەجەلى كۇيىك شالدى. ءقازىر ۇيىندە ەمدەلىپ جاتىر. 13ء-ى كۇنى دە وسىنداي وقيعا بولىپ، ەر ادامنىڭ اياعىن ءبىرىنشى دارەجەلى كۇيىك شالدى، ول دا ۇيىندە ەمدەلىپ جاتىر، - دەيدى. 

وبلىستىق (ءىىد) باسپا ءسوز ورتالىعى بەرگەن مالىمەت بويىنشا، «تامىزدىڭ 12ء-سى كۇنگى وقيعاعا بايلانىستى شىمكەنت قالاسى ەڭبەكشى اۋدانى پوليسيا ءبولىمى قىلمىستىق كودەكستىڭ «بۇزاقىلىق» بابى بويىنشا ءىس قوزعاپ، تەرگەۋ جۇرگىزىپ جاتىر. چاپايەۆ ەلدىمەكەنىنىڭ ءبىر تۇرعىنى (ەر ادام) كۇدىكتى رەتىندە ۇستالعان. ەكىنشى جايتقا قاتىستى ىزدەستىرۋ جۇمىستارى باستالعان. ەكى جارىلىستىڭ بىر-بىرىنە بايلانىسى جوق».

ال تامىزدىڭ 13ء-ى كۇنى بولعان جارىلىستان زارداپ شەككەن ازاماتتىڭ اكەسى سايدۋللا ساليبەكوۆ «سوڭعى ءۇش جىلدا چاپايەۆ ەلدى-مەكەنىندە تۇسىنىكسىز جاعدايدا بىرنەشە رەت وسىنداي جارىلىستار بولعانىن» ايتتى.

2012-2013 جىلدارى شىمكەنتتىڭ چاپايەۆكا ەلدى مەكەنىندە بولعان بىرنەشە جارىلىستار سالدارىنان ءبىر ادام اۋىر جارالانىپ، ەكى ادام ورتاشا دارەجەدە جاراقاتتانعان ەدى. جەرگىلىكتى قۇقىق ورگاندارى سول جارىلىستارعا قاتىسى بار دەگەن كۇدىكپەن ۇستاعان ءۇش ادامنىڭ ءىسىن قاراعان سوت بىلتىر كوكتەمدە ولاردى ايىپتى دەپ تانىپ، ەكەۋىن 14 جىلعا جانە بىرەۋىن 13 جىل مەرزىمگە باس بوستاندىعىنان ايىرىپ، جازالارىن قاتاڭ رەجيمدەگى كولونيادا وتەۋگە جانە دۇنيە-مۇلىكتەرىن تاركىلەۋگە ۇكىم شىعارعان.

نۇرزات توعجان