بالي ارالىندا جول اپاتىنا ۇشىراعان قازاقستاندىق ەسىن جيدى، - دەپ حابارلايدى «قامشى» پورتالى Tengrinews.kz-كە سىلتەمە جاساي وتىرىپ.  

بۇل تۋرالى تولىعىراق ق ر ءسىم باسپاسوز-قىزمەتىندە ايتىلعان.

ۆەدومستۆو وكىلدەرىنىڭ مالىمەتىنشە، قازاقستان ازاماتى رۋسلان يسايەۆ موتوسيكلدە ۇشىراعان جول اپاتىنىڭ ۋاقىتى - 2015 جىلدىڭ 6 تامىزى. ول Sanglah Hospital اۋرۋحاناسىنا باسسۇيەك مي جاراقاتىمەن ءتۇسىپ، بىرنەشە كۇن بويى ەس-تۇسسىز جاتقان. قازىرگى ۋاقىتتا رۋسلان يسايەۆ كومادان شىقتى. دارىگەرلەر ونىڭ جاعدايىنىڭ تۇراقتى ەكەنىن ايتتى.

"بۇل وقيعا قازاقستاننىڭ يندونەزياداعى ەلشىلىگىنىڭ باقىلاۋىندا. كونسۋلدىق ءبولىمنىڭ قىزمەتكەرلەرى زارداپ شەككەن ازاماتتىڭ تۋىستارىمەن بايلانىس ورناتتى جانە مۇنداي جاعدايدا قاجەتتى بولاتىن كومەكتى كورسەتىپ جاتىر"، - دەدى مينيسترلىكتەگىلەر.

ەسكە سالايىق، وسىعان دەيىن تاۋ شاڭعىسىنان سپورت شەبەرى، قازاقستاندىق رۋسلان يسايەۆتىڭ بالي ارالىندا جول اپاتىنا ۇشىراعانى حابارلانعان بولاتىن. 32 جاستاعى سپورتشى ءوز موتوسيكلىمەن باسقا بىرەۋدىكىنە سوققان. 

رۋسلاننىڭ اناسى تامارا يسايەۆانىڭ ايتۋىنشا، يندونەزياعا ول 30 شىلدەدە ۇشىپ كەتكەن، كەيىن ونىڭ ارتىنان دوستارى باراتىن بولدى.

جول اپاتى جونىندە ونىڭ تانىسى نيكولاي كان تولىعىراق ايتىپ بەردى. ونىڭ مالىمەتىنشە، قازاقستاندىق سپورتشىنىڭ باس سۇيەگى سىنعان، ميىنا قان قۇيىلعان، ءقازىر رۋسلان بالي ارالىنىڭ ورتالىق اۋرۋحاناسىندا جاتىر. ونىڭ جاعدايى تىم اۋىر. وعان قۇنى 90 مىڭ دوللار بولاتىن وپەراسيا جاسالۋى كەرەك.