«قازاقستان حالقى اسسامبلەياسى ەتنوجۋرناليستيكا سالاسىنداعى «شاڭىراق» اتتى بايقاۋعا قاتىسۋ ءۇشىن ماتەريالداردى قابىلداۋدىڭ باستالعانىن جاريالايدى. وعان تەليەۆيزيا، راديو جانە باسپا ءسوز تىلشىلەرى قاتىسا الادى. بۇل تۋرالى "قامشى" اقپاراتتىق پورتالى inform.kz - كە سىلتەمە جاساي وتىرىپ حابارلايدى. 

ال، بايقاۋعا قاتىسۋشىلاردىڭ مىندەتىنە كەلسەك: ۇسىنىلاتىن ماتەريالداردىڭ مازمۇنى رۋحاني كەلىسىم يدەيالارىن، قازاقستاندىق ءپاتريوتيزمدى قالىپتاستىرۋ مەن ناسيحاتتاۋعا باعىتتالۋى قاجەت. سونىمەن قاتار ۇسىنىلاتىن ماتەريالدار قازاقستان رەسپۋبليكاسىنداعى ۇلتارالىق قاتىناستاردىڭ ءار ءتۇرلى قىرلارىن قامتىپ، ەتنومادەني بىرلەستىكتەردىڭ، قازاقستان حالقى اسسامبلەياسى مەن كىشى اسسامبلەيالاردىڭ قىزمەتىن بايانداپ، قازاقستان حالقىنىڭ مادەنيەتىن دامىتۋعا اتسالىسۋى قاجەت".

2015 جىلعى بايقاۋ بەس نوميناسيا: «قازاقستاندىق ءپاتريوتيزمدى نىعايتۋ»، «مەملەكەتتىك ءتىل مارتەبەسىن كوتەرۋ»، «ۇلتارالىق دوستىق پەن تاتۋلىقتى بەكىتۋ»، «قازاقستانداعى ۇلتتاردىڭ مادەنيەتى مەن ءداستۇرىن دامىتۋ»، «قازاقستان حالقى اسسامبلەياسىنىڭ قىزمەتىن ءتۇسىندىرۋ» اتالىمدارى بويىنشا وتەدى.

بايقاۋعا قاتىسۋعا وتىنىشتەر قازاننىڭ 25-ىنە دەيىن قابىلدانادى. بايقاۋ قورىتىندىسى اعىمداعى جىلدىڭ قاراشاسىندا قحا حالىقارالىق مەديا-فورۋمى اياسىندا جاريالانادى.