قىتايدىڭ تيانسزين قالاسىنداعى لوگيستيكالىق كومپانيانىڭ قويماسىندا بولعان جارىلىستان قازا تاپقاندار سانى 85 ادامعا جەتكەن. بۇل تۋرالى "قامشى" اقپاراتتىق پورتالى tengrinews.kz- كە سىلتەمە جاساي وتىرىپ حابارلايدى.

سوڭعى مالىمەتتەرگە سۇيەنسەك،  ۇيىندىلەر اراسىنان تاعى 44 ادام قۇتقارىلعان، بۇعان دەيىن 55 ادامنىڭ قازا تاپقانى، 701 ادامنىڭ جاراقاتتانعانى حابارلانعان ەدى.

باسپا ءسوز قىزمەتىنىڭ مالىمەتىنشە، تيانسزيندەگى جارىلىستان 170 مىڭ ءۇي، 1700 كومپانيا، 675 دۇكەن زارداپ شەگىپ، 10 مىڭنان اسا اۆتوموبيل ورتەنىپ كەتكەن. قويماداعى ورتەنگەن حيميكاتتاردىڭ ناقتى مولشەرى بەلگىسىز.

ەسكە سالا كەتەيىك، 12 تامىزدا قىتايدىڭ سولتۇستىگىندەگى تيانسزين قالاسىنداعى Ruihai Logistics لوگيستيكالىق كومپانياسىنىڭ ءقاۋىپتى زاتتار ساقتالاتىن قويماسىندا جارىلىس بولعانى حابارلانعان ەدى. قىتايدىڭ سەيسميكالىق اگەنتتىگى ءبىرىنشى جارىلىستىڭ تروتيل ەكۆيۆالەنتىندە ءۇش توننالىق كۇشكە يە بولعانىن، ال ەكىنشىسى 21 توننا بولعانىن حابارلادى.