مينيستر مەن ماجىلىسمەننىڭ اراسىنداعى داۋعا نۇكتە قويىلدى. نۇكتەنى قويعان پوليسەيلەر بولعان.
ىشكى ىستەر مينيسترلىگى دەپۋتات ازات پەرۋاشيەۆتىڭ ءبىلىم جانە عىلىم ءمينيسترى اسلان سارىنجىپوۆكە قاتىستى ارىزىن كەرى قايتارىپ بەردى دەپ حابارلايدى «قامشى» پورتالى كتك ارناسىنا سىلتەمە جاساي وتىرىپ.
سوتقا دەيىنگى تەكسەرۋ جۇرگىزگەن ساقشىلار ءسارىنجىپوۆتىڭ سوزىنەن قىلمىستىق ارەكەت تاپپاپتى.
جالپى داۋ ماجىلىستە قارالعان جوعارى وقۋ ورىندارىن اتتەستاسيادان بوساتىپ، اككرەديتاسيادان وتكىزۋگە قاتىستى زاڭ جوباسىنان باستالعان ەدى.
«اق جول» پارتياسىنىڭ جەتەكشىسى «ءدال وسى سالانى يگەرە الماي وتىرسىڭ» دەپ، ءبىلىم ءمينيسترىنىڭ وتستاۆكاعا كەتۋى كەرەكتىگىن ايتقان بولاتىن.
ال ءسارىنجىپوۆ پەرۋاشيەۆتىڭ ءوزىن جەكە ۋنيۆەرسيتەتتەردىڭ قىزىعۋشىلىعىن قورعاپ جۇرگەن «لوببيست» دەپ سالدى. بۇنى ەستىگەن ماجىلىسمەن شالقاسىنان ءتۇستى. بۇل تۋرالى «قامشى» پورتالى دا جازعان بولاتىن.
ءسويتىپ، «ار-نامىسىما كىر كەلتىردى، جۇمىسىما كەدەرگى جاسادى» دەپ ءمينيستردىڭ ۇستىنەن باس پروكۋراتۋراعا شاعىمداندى. سول ارىزدى ساقشىلار ەكى ايدان اسا قاراپتى. قىلمىستىق ارەكەت تاپپاعان سوڭ ءىستى سوتقا جەتكىزبەي توقتاتقان.
جالپى پەرۋاشيەۆتى ءسارىنجىپوۆ عانا ەمەس، بۇعان دەيىنگى ءبىلىم ءمينيسترى باقىتجان جۇماعۇلوۆ تا «لوببيست» دەپ اتاعان ەدى. ول كەزدە دەپۋتات ءدال بۇلاي شامدانباعان.
