قازاق حاندىعىنىڭ جارتى مىڭجىلدىعىنا وراي اۋەزوۆ تەاترىنىڭ ۇجىمى اۋقىمدى سپەكتاكل دايىنداپ جاتىر. جابال ەرعالييەۆتىڭ "قيلى جول" شىعارماسىنىڭ جەلىسىندەگى قويىلىمعا كەرەي مەن جانىبەك تۇسىنداعى وقيعالار ارقاۋ بولعان. سپەكتاكلگە ۇزىن-ىرعاسى 500-دەن استام اكتەر قاتىسدى. جازعى دەمالىس ماۋسىمىنا قاراماستان، اۋەزوۆ تەاترىنىڭ ۇجىمى ءقازىر قىزۋ جۇمىس ىستەۋ ۇستىندە. بۇل تۋرالى "قامشى" اقپاراتتىق پورتالى tengrinews.kz-كە سىلتەمە جاساي وتىرىپ حابارلايدى.

سونىمەن قاتار، شىعارمادا 1465 جىلعى ەلەۋلى وقيعا، ياعني كەرەي مەن جانىبەكتىڭ قازاق حاندىعىنىڭ قازىعىن قاققانى باياندالاتىنى ايتىلادى. 1 ساعاتقا جوسپارلانعان سپەكتاكلدە جانىبەك پەن كەرەيدىڭ ءابىلحايىر حاننان ءبولىنىپ، ازاتتىق پەن بوستاندىقتى ارمان ەتكەن قالىڭ قازاقتى ارتىنان ەرتىپ، ءبىر تۋ استىنا جيناعان كەزەڭى بەينەلەنەدى.

قويىلىمدا حاندىقتىڭ قالاي قۇرىلعانى، ول كەزدەگى تالاس-تارتىس، قيلى زامان ەگجەي-تەگجەيلى كورسەتىلەدى. اشىق اسپان استىندا، ۇلكەن ستاديوندا قويىلاتىن اۋقىمدى سپەكتالدە اۋەزوۆ تەاترى مەن تاراز قالاسىنىڭ 500-دەن استام ءارتىسى اتسالىسادى. 200 اكتەر جاۋىنگەردىڭ رولىندە ويناپ، ساحنالىق شايقاستارعا جاۋاپتى بولسا، 150-دەن استام ادام بي كورىنىستەرىن جاسايدى. حV عاسىرداعى كوشپەندى قازاقتىڭ باي مادەنيەتى قامتىلاتىن قويىلىمدى جۇتاڭ ەتىپ كورسەتپەۋ ءۇشىن ارنايى كوستيۋمدەر مەن بەزەندىرۋلەر ازىرلەنىپ جاتىر.

"قيلى جول" قويىلىمىن بارشا كورەرمەن قازان ايىندا تاراز قالاسىنىڭ ورتالىق ستاديونىندا تاماشالاي الادى. قازاق حاندىعىنىڭ جارتى مىڭجىلدىعىن تويلاۋ بارىسىندا جارىققا شىعاتىن سپەكتاكلگە ەلباسىنىڭ ءوزى ارنايى كەلىپ قاتىسادى دەپ جوسپارلانىپ وتىر.