ەلدە قالىپتاسقان جاعدايعا بايلانىستى قازاقستاننىڭ زيالى قاۋىم وكىلدەرى ەل تۇرعىندارىنا ارناپ ۇندەۋ جولدادى. ولاردىڭ اراسىندا قازاق جازۋشىسى جانە كينودراماتۋرگ، قازاقستان جازۋشىلار وداعىنىڭ مۇشەسى، قازاقستاننىڭ ەڭبەك سىڭىرگەن قايرەتكەرى سماعۇل ەلۋباي، اكتەر، تەاتر جانە كينو رەجيسسەرى ءاسانالى ءاشىموۆ، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت بار.

«بۇرىن سوڭدى بولماعان وسىنداي ناۋبەت كەزىندە بىرىگەيىك. بىرلەسىپ جۇمىس ىستەيىك، ءبىر-بىرىمىزدى تىڭدايىق. جوعارىدان بەرىلىپ جاتقان مالىمەتتەردى ورىندايىق. قارت بۋىنعا مەن سەنەم، ولاردىڭ تارتىبىنە سەنەمىن. مەن مىناۋ جاستارعا كوڭىل اۋدارىپ وتىرمىن. قالاي بولسا سولاي ءجۇرىپ، ماسكاسىز ءجۇرىپ، تويلار جاساپ، جيىندار جاساۋدى دوعارۋ كەرەك ۋاقىتشا. تويلايتىن ۋاقىت الدا»، — دەگەن ءاسانالى ءاشىموۆ ەل وسىناۋ كۇردەلى جاعدايدان شىققاندا قۋانىشتى ساتتەردى اتاپ وتەتىن كەزدەر كوپ بولاتىنىن اتاپ ءوتتى.

«بارلىعى ادامنىڭ اقىلىنا بايلانىستى. مەملەكەتىمىزدىڭ بايلىعى – حالىق. حالىق بايلىعى – ەل بايلىعى. سوندىقتان ءارقايسىمىز بىر-بىرىمىزگە ادال بولايىق، ءار ۋاقىتتا بىر-بىرىمىزگە قورعانىش بولايىق. ساقتايىق ءبىر-بىرىمىزدى، ول ءۇشىن ءتارتىپ كەرەك. وسىنى قولعا الايىق»، — دەپ ۇندەۋ تاستادى ءاسانالى ءاشىموۆ.

ءوز كەزەگىندە اقىن، جۋرناليست جانە رەداكتور ۇلىقبەك ەسداۋلەت تە قالا تۇرعىندارىنان ەپيدەميولوگيالىق تالاپتاردى ساقتاپ، ءوز دەنساۋلىقتارىنا بەي-جاي قاراماۋعا شاقىردى.

«الەمدى تىتىرەنتكەن كوروناۆيرۋس ىندەتى ءبىزدىڭ حالقىمىزعا دا قىرعيداي ءتيىپ، شەتىنەن باۋداي ءتۇسىرىپ جاتىر. كۇندە ەستيتىنىڭ قارالى حابار، ازالى سوزدەر. حالقىمىزدىڭ نەبىر اتپال، ابزال ازاماتتارى، قايراتكەر تۇلعالارى، دارىندى، تالانتتى ادامدارى بەيمەزگىل دۇنيەدەن ءوتىپ جاتىر. قارالى شاڭىراقتار، ازالى وتباسىلار كۇننەن كۇنگە كوبەيىپ بارا جاتىر. سوندىقتان ءبىز ساقتىق شارالارىن قايتادان كۇشەيتۋىمىز كەرەك، ءبىز ەندى بۇلاي قاراپ وتىرا بەرىپ، شىبىنشا قىرىلا بەرۋگە بولمايدى. مەديسينانى مەملەكەت قولىنا الىپ، ءبارىن تىرتىپكە كەلتىرىپ جاتقان كەزدە دارى-دارىمەكتى، گۋمانيتارلىق كومەكتەردى،جەدەل جاردەمدى، اۋرۋحانالاردى جوندەپ جاتقان كەزدە ءبىز دە ءوزىمىز ساقتىق شارالارىن ساقتاپ، مەديسينالىق نورمالاردى ساقتاپ، ىندەتتى جەڭۋگە ءبىر كىسىدەي ات سالىسايىق»، — دەدى ۇلىقبەك ەسداۋلەت.

سونىمەن بىرگە، ول كوپ ادامداردىڭ جينالۋىمەن توي، سالتاناتتى شارالار مەن باسقا جيىنداردىڭ ءالى دە وتكىزىلەتىنىن ايتىپ، ەل ازاماتتارىنان وسىنداي شارالاردى ۋاقىتشا وتكىزبەي تۇرۋعا شاقىردى.

«باياعىدا شاقىرعان جەردەن قالما دەۋشى ەدى، قازىرگى كەزدە شاقىرعان جەرگە بارما دەيتۇعىن ماتەل پايدا بولدى. سوندا دا قويماستان ءبىزدىڭ ارامىزدا، اۋىلدارىمىزدا، قالالارىمىزدا تىعىلىپ توي جاساۋ، تىعىلىپ سۇندەت توي، باسقا دا قىز ۇزاتۋ، كەلىن ءتۇسىرۋ، تۋعان كۇن دەگەن دۇنيلەردى، ءتىپتى ءبىر تۇنگى كلۋبتارعا جينالىپ الىپ، بولماسا، تاۋعا بارىپ تىعىلىپ توي-تومالاق وتكىزۋ ادەتى ءالى دە تىيىلماي تۇر. سونىڭ ءبارىن پىشاق كەستى توقتاتۋ كەرەك، ايتپەسە ءبىز وسىنداي تارتىپسىزدىك ارەكەتتەرىمىزبەن، نورمالاردى ساقتاماۋ ارەكەتتەرىمىزبەن كوروناۆيرۋس سياقتى دۇشپانعا كومەكتەسكەن بولىپ شىعامىز. سوندىقتان مىڭ جەردەن قازاقتىڭ تويعا بارماسا ۇيات، توي بولماسا ۇيات، قوناق شاقىرماسا ۇيات، قوناققا بارماسا ۇيات دەيتىن ادەتتەرىنە قازاقتىڭ ۇياتى كىنالى بولسىن دەگەن ويمەن جازىپ، تاراتىپ جاتقاندار بار. مەنىڭشە بۇل دۇرىس ەمەس. قازاقتىڭ ۇياتىنا تيىسپەۋ كەرەك. قازاقتىڭ ار-ۇياتى ءارقاشاندا بيىكتە. مۇنىڭ سەبەبىن ىزدەيتىن بولساق، ۇياتتان ەمەس، ۇياتسىزدىقتان، تارتىپتەن ەمەس، تارتىپسىزدىكتەن ىزدەۋىمىز كەرەك. سوندىقتان قاشان دا ساقتىق شارالارىن ابايلاپ، مەديسينالىق نورمالاردى قولدانىپ، بارلىعىنا دا اباي بولايىق. ۇمىتپەن ءومىر سۇرەيىك، سەنىممەن كۇن كەشەيىك! امان-ساۋ جۇزدەسەيىك دەگىم كەلەدى»، — دەدى ۇلىقبەك ەسداۋلەت.