سايرامدا پوليسەيلەر كارانتين كەزىندە توي وتكىزىپ جاتقان تۇرعىنداردى انىقتاپ، جيىندى توقتاتتى دەپ حابارلادى Polisia.kz.

سايرام اۋداندىق پوليسيا بولىمشەسىنە مانكەنت اۋىلىندا تۇرعىننىڭ ءبىرى 50-دەن اسا ادام جيناپ، كەلىن ءتۇسىرىپ توي جاساپ جاتقانى جايلى حابارلاما كەلىپ ءتۇستى. پوليسەيلەر مەكەن-جايعا جەتىپ، تويدى توقتاتادى.

كارانتين تالاپتارىن ساقتاماعانى ءۇشىن توي يەلەرىنە اكىمشىلىك قۇقىق بۇزۋشىلىق تۋرالى كودەكسىنىڭ 425-بابىنا سايكەس “حالىقتىڭ سانيتارلىق-ەپيدەميولوگيالىق سالاۋاتتىلىعى سالاسىنداعى زاڭناما تالاپتارىنىڭ، سونداي-اق گيگيەنالىق نورماتيۆتەردىڭ بۇزىلۋى” حاتتاما تولتىرىلدى.

اۋداندا وسىعان ۇقساس 2 جاعداي تىركەلگەن. تۇرعىنداردىڭ ءبىرى ۇيىندە 20-دان استام ادام جيناپ، كەلىن تۇسىرگەن. ەكىنشى توي يەلەرى ۇيىنە 15-تەن اسا ادام شاقىرىپ، قىز ۇزاتۋ تويىن وتكىزگەن. اۋدان كولەمىندە جۇمىس جاساپ جاتقان موبيلدىك توپ كارانتين ەرەجەسىن بۇزعان توي-جيىنداردى شۇعىل توقتاتقان.