قازاقستاندا تۋعان ازيانىڭ ۆيسە-ميسسى جاننا ستينسون «بورات» ءفيلمى ءۇشىن ازيا ارۋى بايقاۋىنا قاتىسقانىن مالىمدەدى.

بۇل تۋرالى «قامشى» پورتالى «تۋمباعا» سىلتەمە جاساي وتىرىپ جازادى.

جاننا ستينسون (نەگىزگە تەگى - دوسمۇحامەتوۆا) قازاقستاندا تۋعانىمەن، ءقازىر ول اقش-تا تۇرادى.

اقتاۋ قالاسىنىڭ تۋماسى امەريكالىق باسىلىمعا بەرگەن سۇحباتىندا ول ازيا ارۋى بايقاۋىنا امەريكالىقتاردىڭ قازاقستانعا دەگەن كوزقاراسىن وزگەرتۋ ءۇشىن قاتىسقانىن ايتقان.

بىلتىرعى جىلى اقش-تا وتكەن «ازيا ارۋى»  «Miss & Mrs Asia USA» بايقاۋىندا ول 30 ەلدىڭ  اراسىنان قازاقستاننىڭ نامىسىن قورعاعان جالعىز قىز بولعان.  جارىس ناتيجەسىندە جەرلەسىمىز 2-ورىندى يەلەنگەن.

«بىزگە جۇكتەلگەن تالاپتار بويىنشا، ءبىز ءتۇرلى قايىرىمدىلىق شارالارىنا قاتىسىپ، جەتىم-جەسىرلەرگە كومەك بەرىپ تۇرۋىمىز كەرەك. سونداي-اق،  كەز كەلگەن جاعدايدا جۋرناليستەردىڭ سۇراعىنا جاۋاپ تابا الۋىمىز قاجەت. مەن بالالىق شاعىمدى قازاقستاننىڭ كىشكەنتاي ءبىر اۋىلىندا وتكىزدىم. قازاق سالتىندا قالىپتاسقانداي مەنى اجەم تاربيەلەدى. ءبىزدىڭ اۋىلىمىز ورتالىق ازيانىڭ شالعاي ءبىر تۇكپىرىندە ورنالاسقان ەدى. مەن اجەمە قاراپ، ءۇي شارۋاسىمەن اينالىستىم. بۇل ماعان ۇنايتىن دا. سەبەبى، مەن ۇلكەن كىسىلەردىڭ قاسىندا بولعاندى جاقسى كورەتىنمىن. ولاردان ۇيرەنەرىمىز دە كوپ قوي. بۇل مەنىڭ ومىرىمدەگى ۇمىتىلماس كەزەڭدەردىڭ ءبىرى ەدى»،-دەيدى جاننا حانىم  امەريكالىق  «HOLLYWOOD WEEKLY» جۋرنالىنا بەرگەن سۇحباتىندا.

«مەن بۇل بايقاۋعا بىرنەشە سەبەپپەن قاتىستىم. بىرىنشىدەن، مەن بۇل بايقاۋعا ءبىر سايىس سەكىلدى قاراعان جوقپىن.  مەنىڭ جالعىز ماقساتىم – قازاقستاننىڭ مادەنيەتىن الەم ەلدەرىنە پاش ەتۋ بولدى.  مەنىڭ بايقاعانىم، «بورات» فيلمىنەن كەيىن كوپتەگەن امەريكالىقتار قازاقستان تۋرالى وزگەشە ويلاي باستاعان.  بۇل ارينە، جاڭساق تۇسىنىك جانە وعان ولار كىنالى ەمەس تە. تەك ولار سولاي كوردى. ال شىن مانىندە قازاقستان قانداي مەملەكەت؟! مادەنيەتى تۇنىپ تۇرعان، قازبا بايلىقتارى مول تاماشا مەملەكەت قوي. مەنىڭ ماقساتىم امەريكالىقتاردىڭ كوزىن وسىعان جەتكىزۋ بولدى»،-دەيدى جاننا حانىم.

نۇرزات توعجان