قاشىقتىقتان وقىتۋ بارىسىندا بالا مەن پەداگوگتە كومپيۋتەر بولۋى ءتيىس. شىعىس قازاقستاندا وقۋشىلار مەن وبلىس مەكتەپتەرىنىڭ مۇعالىمدەرىن كومپيۋتەرمەن قامتاماسىز ەتۋ ماقساتىندا ساراپتاما جاسالىندى.
تىكەلەي ەفير بارىسىندا شقو اكىمى دانيال احمەتوۆ وڭىردەگى مەكتەپتەردە 33 200 كومپيۋتەر بار ەكەنىن اتاپ ءوتتى. ال وقۋشىلاردىڭ 88 پايىزى ءۇي جاعدايىندا كومپيۋتەرمەن قامتاماسىز ەتىلگەن. 22،4 مىڭ بالانىڭ ونلاين رەجيمدە ءبىلىم الۋىنا تەحنيكالىق جاعداي جاسالماعان. سوندىقتان 17 مىڭنان استام وقۋشى، ەڭ الدىمەن الەۋمەتتىك جاعىنان از قامتىلعان وتباسىلاردا تاربيەلەنىپ جاتقان بالالارعا مەكتەپتەردەگى كومپيۋتەرلەر بەرىلەدى. كەيىن ولار كومپيۋتەردى مەكتەپكە قايتارىپ بەرۋى ءتيىس. سونداي-اق 197 پەداگوگ قاجەتتى تەحنيكامەن قامتاماسىز ەتىلەدى.
– مەكتەپ جاسىنداعى بىرنەشە بالا مەن اتا-اناسى قاشىقتىقتان جۇمىس ىستەپ وتىرعان بالالار بار. ولاردىڭ دەنى ءبىر كومپيۋتەردى قولدانادى. اتالعان ماسەلەە مەكتەپ اكىمشىلىگىندە تالقىلانادى. 25 تامىزعا دەيىن وبلىس مەكتەپتەرىنە قوسىمشا 9،5 مىڭ بىرلىك كومپيۋتەر ساتىپ الامىز. سونىمەن قاتار وكىمەتتىك قوردان 26،5 مىڭ بىرلىك تەحنيكا الۋعا قاراجات ءبولۋ قاراستىرىلىپ وتىر. بۇل قارجى كوزى بالالار مەن پەداگوگتەرگە قاجەتتى تەحنيكانى اپەرۋگە جەتكىلىكتى، - دەدى دانيال احمەتوۆ.
ينتەرنەت ماسەلەسى دە شەشىمىن تابادى. بۇگىنگى كۇنى 189 مىڭ وقۋشىنىڭ 18،3 مىڭى ينتەرنەتپەن قامتاماسىز ەتىلمەگەن. وسى ماسەلەنى شەشۋ ءۇشىن بالالارعا SIM كارتالار مەن تاريفتەر قوسىلعان جوعارى جىلدامدىعى بار 5 620 روۋتەر بەرىلەدى. قالعان 6 877 بالا شتاتتىق رەجيمدە ءبىلىم الاتىن بولادى.
بۇدان بولەك، مەكتەپ جاسىنداعى بالالار تۇراتىن بارلىق ەلدى مەكەندە ينتەرنەت جەلىسىنىڭ جىلدامدىعى ارتاتىن بولادى. ايماق باسشىسىنىڭ ايتۋىنشا، 2020 جىلدىڭ 1 قىركۇيەگىنە دەيىن 52 ەلدى مەكەندەگى ينتەرنەت جەلىسى جىلدامدىعىن جوعارىلاتادى.
پىكىر قالدىرۋ