سوڭعى ەكى اپتانىڭ ىشىندە قازاق بيلىگىندە ايتارلىقتاي جاڭالىقتار ورىن الدى. ەڭ الدىمەن الماتى قالاسىن ۇزاق باسقارعان ا. ەسىموۆتىڭ استانا جاققا اۋىسىپ، ورنىنا «نۇر وتان» پارتيا ءتوراعاسىنىڭ ءبىرىنشى ورىنباسارى باۋىرجان بايبەكتىڭ تاعايىندالۋى الەۋمەت اراسىندا جاقسى تالقىلاندى. تالقى بارىسىندا «جاس كەلسە، ىسكە» دەگەن فرازا ءجيى ايتىلدى. ال بۇگىن شىمكەنت قالاسىنا عابيدۋللا ءابدىراحىموۆ اكىم ەتىپ تاعايىندالدى. تاعايىندالعان ەكى اكىم دە «بولاشاق» باعدارلاماسىمەن گەرمانيادا ءبىلىم العان. ەكەۋىن دە پرەزيدەنت ءوزى دايىنداعان كادر دەپ ايتۋعا تولىق نەگىز بار. دەمەك بيلىك ءوزىنىڭ بۋىندى كادرىن وسى ۋاقىتتقا دەيىن دايىنداپ، ەندى ساياسي ساحناعا شىعارا باستادى دەگەن ءسوز. ايتالىق، ءابدىراحىموۆ قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى، پرەمەر-مينيستر كەڭسەسىنىڭ باسشىسى قىزمەتتەرىن اتقارعان. دەمەك ، ول- نەگىزگى ساياسي جۇيە اسحاناسىنىڭ قازانى قالاي قاينايتىنىن كورگەن كادر. الماتى قالاسىنىڭ جاڭا اكىمى تاعايىندالعان تۇستا دا «قامشى» پورتالى ب. بايبەكتىڭ الماتى قالاسىنىڭ اكىمتاعىنا دەيىنگى جولىن ساراپتاپ ۇسىنعان بولاتىن. اڭعارعانىمىزداي «بولاشاق» باعدارلاماسىنىڭ العاشقى قارلىعاشتارى ەل نازارىنا ىلىگە باستادى. سىرتتان ءبىلىم مەن تاجىريبە جيناقتاپ كەلگەن جاستارعا حالىقتىڭ سەنىم ارتقىسى كەلەدى. جاستار دەمەكشى، «وتىزدا وردا بۇزباعان، قىرىقتا قامال المايدى» دەپ ەسەپتەيتىن قازاق ءۇشىن ساياساتتاعى قىرىق جاس- تىم جاس كورىنەتىنىن بايقادىق. شىندىعىندا، الىپ شاھارلاردىڭ تىزگىنىن قولعا ۇستاۋ ءۇشىن-«ەۋروپا بارىپ» ءبىلىم الىپ، ساياسي جۇيەنىڭ قازانىندا قايناۋعا ۋاقىت كەتەدى. باستىسى بيلىككە جاڭا لەك جانە جاڭا لەپ كەلىپ جاتىر. كىمدەردەن قالماعان اكىمتاق دەيسىز؟ قازاقتىڭ قىرۋار قارجىسىن قىمقىرىپ حراپۋنوۆ وتىرىپ كەتكەن اكىمتاق بولاتىن. ول كەزدە قازاق ءوز ساياسي كادرىن دايارلاۋدى جاڭادان عانا قولعا الىپ جاتسا كەرەك-تى. سول دايىن بولعان بالالار ەندى-ەندى توبە كورسەتىپ جاتىر. وت جانعان جەردە كۇل قالادى.(اسىرەسە الماتى قالاسىنىڭ ءيميدجى سوڭعى جىلدارى وتقا ابدەن ورناعان ەدى) ول كۇلدى قايتا تازالاپ، ورنىن كوكالعا اينالدىرىپ ابىروي جيناۋدىڭ ءوزى وڭاي شارۋا ەمەس.
وسى تۇستا كوكەيدە كولەڭكەلەپ جاتقان تاعى ءبىر سۇراق قىلاڭ بەرەدى. الماتىدان باستالىپ، شىمكەنتپەن جالعاسىن تاپقان اكىمتاق يەسىن اۋىستىرۋ باسقا قالالاردا دا ورىن الا ما؟ نەگە وزگە وڭىرلەردە اكىمدەر مەن ونىڭ ورىنباسارلارى جەمقورلىق فاكتىسىمەن تاقتارىن تاستاۋعا «ءماجبۇر»؟ بولاشاقتا پرەزيدەنتتىككە ۇمىتكەرلەرگە ارنالعان تالاپتىڭ ىشىندە؛ ««بولاشاق» باعدارلاماسىنىڭ تۇلەگى بولۋى ءتيىس»،- دەپ كورسەتىلۋى مۇمكىن بە؟
اينۇر تولەۋ
پىكىر قالدىرۋ