بۇگىن عانا قازاقستان پرەزيدەنتى نۇرسۇلتان نازاربايەۆ قارجىلىق قيىندىقتىڭ قازاقستاندى قوس بۇيىردەن قىسقالى تۇرعاندىعىن ايتىپ، ەكونوميكالىق داعدارىستىڭ كەلە جاتقاندىعىن ەسكەرتكەن ەدى.

سونداي-اق، ق ر ۇكىمەت باسشىسى كارىم ءماسىموۆتىڭ قاتىسۋىمەن وتكەن ۇكىمەتتىڭ سەلەكتورلىق وتىرىسىندا دا  پرەمەر مىرزا ۇلتتىق بانكتىڭ دوللار باعامىن ۇستاپ تۇرا المايتىنىن ايتىپ، تەڭگە باعامىن ەركىنە جىبەرەتىنىن مالىمدەگەندە تاعى دا تەڭگە ديەۆالۆاسياسىنىڭ بولاتىنىن،  داعدارىستىڭ حالىقتىڭ قالتاسىنا سالماق سالاتىنىن اڭعارتسا كەرەك-تى.

مينيستر مىرزا مالىمدەمە جاساعانى سول-اق ەكەن، قازاقستاننىڭ بارلىق وبلىستارىنداعى ۆاليۋتا ايىرباستاۋ ورىندارىندا دوللار باعاسى شارىقتاپ كەتتى.

سوڭعى اقپاراتتار بويىنشا، قازىرگى ۋاقىتتا دوللاردىڭ ءبىر تەڭگەگە شاققانداعى باعامى – 256ء-تى كورسەتتى.

بىزدەگى قالىپتاسقان جۇيە بويىنشا، كەز كەلگەن شەشىم، زاڭنامالىق قۇجاتتار – ءماسىموۆ مىرزا ماقۇلداماسا قۇنى كوك تيىن ەكەنى تۇسىنىكتى. ءقازىردىڭ وزىندە الەۋمەتتىك جەلىلەر مەن قازاقستاندىق بۇقارالىق اقپارات قۇرالدارىندا كەلىمبەتوۆتى كەلەمەجگە اينالدىرا باستاعان. ءبىراق، دوللار باعاسىنىڭ شارقتاۋىنا – ۆاليۋتالىق ءدالىزدىڭ الىنىپ تاستالۋى سەبەپ بولعانىن ەسكەرسەك، سوققىنى ءماسىموۆ مىرزا جەۋى ءتيىس ەدى. الايدا، بىزدەگى ورنىققان ساياسي «ويىنشىقتاردىڭ» بۇعان ەتى ۇيرەنىپ قالعانى جاسىرىن ەمەس تە شىعار.

 ەندەشە، پرەمەر مىرزانىڭ ايتقانىنداي، ۇلتتىق بانك ءوز سالماعىن جوعالتىپ، ەندى تەڭگە باعىمىن ۇستاپ تۇرا المايتىن بولسا، كەلىمبەتوۆتىڭ كوزىنە كوك شىبىن ۇيمەلەيتىن ۋاقىت تا الىس ەمەس دەپ توپشىلاۋىمىزعا ابدەن بولاتىن سەكىلدى.

«ءوڭىر اكىمدەرى شتابتارعا باسشىلىق جاساپ، جەرگىلىكتى بيۋدجەتتەن قارجىلاندىرىلاتىن اتاۋلى الەۋمەتتىك جانە تۇرعىن ءۇي كومەكتەرىنىڭ دەڭگەيىن ارتتىرۋ ارقىلى حالىقتىڭ الەۋمەتتىك از قامتىلعان توبىنا قولداۋ شارالارىن قابىلداۋى ءتيىس. سونىمەن قاتار باعانىڭ، اسىرەسە، الەۋمەتتىك ماڭىزى بار ازىق-تۇلىكتەر مەن قىزمەتتەرگە نەگىزسىز وسىمىنە جول بەرمەۋ بويىنشا ۇيىمداستىرۋشىلىق شارالارىن قابىلداۋدى تاپسىرامىن»، – دەپ، جەدەل شارالاردى جالپى ۇيلەستىرۋدى ءوزىنىڭ ءبىرىنشى ورىنباسارى باقىتجان ساعىنتايەۆقا، ال الەۋمەتتىك ماسەلەلەردى ورىنباسارى بەردىبەك ساپاربايەۆقا جۇكتەگەن ەدى ءماسىموۆ مىرزا. ءسىرا، بىردەڭەنى سەزسە كەرەك-تى.

بۇل جولعى تەڭگەنىڭ ءقۇنسىزدانۋى مەن دوللار باعاسىنىڭ كۇرت شارىقتاۋى – ءبىرىنشى كەزەكتە قاراپايىم حالىقتىڭ قالتاسىنا سالماق سالاتىنى بەلگىلى. اسىرەسە، يپوتەكاعا جانە نەسيەگە تۇرعىن ۇيلەر مەن مۇلىك العاندار 40 پايىزدىق ۇستەمە اقى تولەۋگە ءتيىستى ءماجبۇرلى بولاتىنى انىق.

باس بانكيردىڭ دوللار باعاسى 190 تەڭگەدەن  اسپايدى دەپ سەندىرگەنى مەن ول حالىقتىڭ سەنىمىنەن شىققالى قاشان؟! ال سەنىمنەن شىققان ۇكىمەتكە حالىق رازى بولماسى انىق. تەك «حالىق كوتەرىلىپ كەتپەسە يگى» دەپ سەنەيىك.

قازاقستاندىق ەكونوميستەردىڭ بولجامدارىنا سۇيەنسەك، الداعى ۋاقىتتا دوللار باعامى تۇراقسىزدانادى. ىلە-شالا ازىق-تۇلىك باعاسى شارىقتاپ شىعا كەلەدى.

جوعارىداعى جايتتاردى ەسكەرە كەلە، ءبىر ەمەس، بىرنەشە مارتە حالىقتى الداپ سوققان الاياقتار جازاسىز قالماۋى ءتيىس دەپ توپشىلاۋىمىزعا ابدەن بولاتىن سەكىلدى.

سوندىقتان، ق ر ۇكىمەت باسشىسى ك.ءماسىموۆ پەن ق ر ۇلتتىق بانكتىڭ ءتوراعاسى قايرات كەلىمبەتوۆتەر وتستاۆكاعا كەتۋى ءتيىس! قاجەت بولسا بار قازاقتىڭ تاعدىرىن قولىنا ۇستاعان اقساقال بيلىكتىڭ دە تاقتان تاياتىن كۇنى الىس ەمەس سياقتى...

نۇرگەلدى ءابدىعاني ۇلى