مۇعالىمدەر كۇنىنە وراي الماتى وبلىسىندا ءداستۇرلى «جىل ءمۇعالىمى» بايقاۋىنىڭ جەڭىمپازى انىقتالدى. ول - اقسۋ اۋدانى، ع.مۇراتبايەۆ اتىنداعى ورتا مەكتەپتىڭ ماتەماتيكا ءپانىنىڭ ءمۇعالىمى اسىل قايمۇحانوۆ. سالتاناتتى شارادا اماندىق باتالوۆ وعان اۆتوكولىكتىڭ كىلتىن تابىستادى.

سالتانات سارايىنداعى “ۇستاز – ۇلى تۇلعا» اتتى شارادا وبلىس اكىمى اماندىق باتالوۆ قاسيەتتى ماماندىق يەلەرىن مەرەكەمەن قۇتتىقتادى.

–قۇرمەتتى ۇستازدار! سىزدەردى  كاسىبي مەرەكەلەرىڭىزبەن شىن جۇرەكتەن قۇتتىقتايمىن! ۇرپاق بويىنا ءبىلىم ءنارىن قۇيعان ەڭبەكتەرىڭىزگە شىعارماشىلىق تابىس، وتباسىلارىڭىزعا باقىت تىلەيمىن. دانا ابايدىڭ: «ۇستازدىق ەتكەن جالىقپاس، ۇيرەتۋدەن بالاعا» دەگەنىندەي، ۇستاز – ۇلى ماماندىق. ول – ەڭ العاش قولعا قالام ۇستاتىپ، ءارىپ ۇيرەتىپ، الىپپەدەن باستاپ، بۇكىل الەمدى تانىتقان ۇلاعاتتى جان. بيىلعى جىل بۇكىل الەمگە جاڭا كوزقاراس اكەلىپ، سانامىزدى وزگەرتتى. ەلدەگى جاعدايعا بايلانىستى، وقۋشىلارىمىز قاشىقتان وقۋعا كوشتى. ءوزىنىڭ قيىنشىلىعى بولعانىمەن ساپالى ءبىلىم بەرۋگە ەش كەدەرگى بولمادى. ۇستازداردىڭ دا، وقۋشىلاردىڭ دا بىلىمگە دەگەن قۇرمەتىن ەسەلەي ءتۇستى. "ونلاين سوڭعى قوڭىراۋ"، "ونلاين العاشقى قوڭىراۋ" ۇعىمدارى قالىپتاستى، ومىرىمىزگە ەندى. وسى جاعدايدا بارىنە تۇسىنىستىكپەن قاراعان وقۋشىلارعا، اتا-انالارعا، ۇستازدارعا ۇلكەن ريزاشىلىق بىلدىرەمىن. تۇڭعىش پرەزيدەنتىمىزدىڭ باستاماسىمەن 2019 جىلى «پەداگوگ مارتەبەسى تۋرالى» زاڭ قابىلدانىپ، مەملەكەت باسشىسى قاسىم-جومارت توقايەۆتىڭ حالىققا جولداۋىندا مۇعالىمدەردىڭ دارەجەسىن كوتەرۋگە، جاعدايىن جاقسارتۋعا ەرەكشە ءمان بەرىلدى. وزدەرىڭىز بىلەسىزدەر، جەتىسۋ ايماعى ەلىمىزدەگى حالىق سانى كوپ ءوڭىر. جىل سايىن دۇنيەگە كەلگەن بالالار سانى ارتىپ كەلەدى. وسىعان وراي، ءبىلىم بەرۋ سالاسىنا ەرەكشە كوڭىل اۋدارىلادى. 2020 جىلدىڭ 1 قاڭتارىنان باستاپ، قازاقستان رەسپۋبليكاسى پرەزيدەنتىنىڭ تاپسىرماسىنا سايكەس، وبلىستا 64 560 شتاتتىق بىرلىك پەداگوگ قىزمەتكەرلەردىڭ ەڭبەكاقىسى 25 پايىزعا كوتەرىلدى، كەلەسى جىلى تاعى 25 پايىزعا كوتەرىلەدى. «ديپلوممەن – اۋىلعا» باعدارلاماسى اياسىندا اۋىلدىق جەرگە جۇمىس ىستەۋگە كەلگەن 4 921 مامانعا كوتەرمە جاردەماقى، 2 371 مامانعا تۇرعىن ءۇي ساتىپ الۋ نەسيەسى بەرىلدى. بۇل جاس ماماندار ءۇشىن ۇلكەن قولداۋ. وسىنداي زور مۇمكىندىكتەردىڭ ارقاسىندا ءبىزدىڭ پەداگوگتار رەسپۋبليكالىق، حالىقارالىق ءتۇرلى ءبىلىم بايقاۋلارىندا ۇزدىكتەر ساپىنان كورىنىپ ءجۇر. بيىل 2 قازاندا كاسىپتىك-تەحنيكالىق ءبىلىم بەرۋ جۇيەسىنە 80 جىل تولدى. بۇل ايتۋلى كەزەڭ وسى جۇيەدە ءبىلىم العان بارلىق مامان يەلەرىنىڭ، ميلليونداعان جۇمىسشىلار مەن قىزمەتكەرلەردىڭ مەرەيتويى دەسە دە بولادى. ەندەشە، قوعامعا قاجەتتى بىلىكتى كادرلار دايارلايتىن مامانداردى قۇتتىقتاۋعا رۇقسات ەتىڭىزدەر. ەڭبەكتەرىڭىز جەمىستى بولسىن! – دەدى.

بۇدان سوڭ اماندىق عابباس ۇلى وبلىسىمىزدىڭ ءبىلىم سالاسىنىڭ دامۋىنا قوسقان زور ۇلەسى جانە جاس ۇرپاقتى ساپالى ءبىلىم، سانالى تاربيە بەرۋدەگى تابىستارى ءۇشىن ءبىرقاتار ۇستازعا قازاقستان رەسپۋبليكاسى ءبىلىم جانە عىلىم مينيسترلىگىنىڭ «ى.التىنسارين»، «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىن، وبلىس اكىمىنىڭ قۇرمەت گراموتاسى، العىس حاتىن تابىس ەتتى. رەسپۋبليكالىق «ۇزدىك پەداگوگ» اتاعىن جەڭىپ الىپ، 2 ميلليون 778 مىڭ تەڭگە  يەلەنگەن ۇستازداردى ماراپاتتادى.

وبلىستىق پەدوگوگيكالىق بايقاۋ جەڭىمپازدارى – «ۇزدىك اۋىل مەكتەبى» اتانعان قاراساي اۋدانى، المالىباق اۋىلىنداعى ورتا مەكتەپ-گيمنازياسىنىڭ ديرەكتورى ساۋلە ماحامبەتوۆاعا، «ۇزدىك كاسىپتىك ءبىلىم بەرۋ ۇيىمى» نوميناسياسىنىڭ يەگەرى جامبىل اتىنداعى ۇزىناعاش كاسىپتىك  كوللەدجىنىڭ ديرەكتورى بولات التايەۆقا، «ۇزدىك سىنىپ جەتەكشىسى» بايقاۋىنىڭ جۇلدەگەرى الاكول اۋدانى، ءۇشارال №1 ورتا مەكتەبىنىڭ ءمۇعالىمى ايگۇل احمەتوۆاعا 500 مىڭ تەڭگەنىڭ سەرتيفيكاتتارى بەرىلدى.

جوعارىدا ايتىپ كەتكەنىمىزدەي، «جىلدىڭ ۇزدىك ءمۇعالىمى» وبلىستىق بايقاۋىنىڭ ءبىرىنشى ورىن يەگەرى اقسۋ اۋدانى، عاني مۇراتبايەۆ اتىنداعى ورتا مەكتەبىنىڭ ماتەماتيكا ءپانى ءمۇعالىمى اسىل قايمۇحانوۆقا اۆتوكولىك كىلتى تابىس ەتىلدى.

ارداگەر ۇستازدار اتىنان ءسوز العان كۇلاي ءتۇسىپ قىزى مۇعالىمدەردى مەرەكەمەن قۇتتىقتاسا، «جىلدىڭ ۇزدىك ءمۇعالىمى» اتانعان اسىل قايمۇحانوۆ اقتارىلا العىسىن جەتكىزدى.

ۇستازدارعا ارناپ ءسۇيىنباي اتىنداعى الماتى وبلىستىق فيلارمونيا انشىلەرى، وقۋشىلار سارايىنىڭ جەتكىنشەكتەرى اننەن شاشۋ شاشتى.