قاشىقتان وقىتۋعا بايلانىستى مۇعالىمدەر جالاقىسى قىسقارمايدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ءبىلىم جانە عىلىم ۆيسە-مينيسترى رۇستەم بيعاري ايتتى.
ونلاين بريفينگتە سۇراق قويعان ءتىلشىنىڭ ايتۋىنشا، الەۋمەتتىك جەلىدە مۇعالىمدەر قاشىقتان وقىتۋعا بايلانىستى جالاقىسىنىڭ قىسقاراتىنىن ايتقان.
– قاشىقتان وقىتۋعا بايلانىستى مۇعالىمدەردىڭ جالاقىسى قىسقاراتىنى راس پا؟ءبىراق مينيستر قىسقارمايتىنىن ايتقان ەدى. ەگەر سونداي جاعداي بولسا، نە ىستەۋ كەرەك؟ – دەپ سۇراق قويدى ءتىلشى.
– ءبىلىم جانە عىلىم ءمينيسترى اسحات ايماعامبەتوۆ ايتقانداي، ەشقانداي جالاقى قىسقارتۋى بولمايدى. ءار جاعدايعا بايلانىستى شەشىمىن قاراستىرۋ كەرەك. ەگەر كىمدە-كىمنىڭ جالاقىسى قىسقارتىلسا، ءبىز بۇل ماسەلەنى قاراستىرامىز. ءىستىڭ ءمان-جايىن انىقتاپ، قورىتىندى شىعارامىز، – دەدى ۆيسە-مينيستر.
پىكىر قالدىرۋ