ماڭعىشلاق-اقتوبە پويىزىندا جۇك ۆاگونى ورتكە ورانىپ، بەس ادام زارداپ شەكتى. پويىزداعى ءورت تۋرالى توتەنشە جاعداي مينيسترلىگىنىڭ باسپا ءسوز قىزمەتى حابارلادى.

2020 جىلعى 14 جەلتوقساندا ساعات 04.30-دا ماڭعىستاۋ وبلىسىنىڭ توتەنشە جاعدايلار دەپارتامەنتىنە ماڭعىستاۋ وبلىسى بەينەۋ اۋدانىنىڭ اۋماعىندا ورنالاسقان №464 ايىرىعى اۋدانىندا №109 "ماڭعىشلاق-اقتوبە" جولاۋشىلار پويىزىنىڭ جۇك تاسىمالداۋ ۆاگونى جانعانى تۋرالى اقپارات كەلىپ تۇسكەن.

اقپارات تۇسكەننەن كەيىن توتەنشە جاعداي ورنىنا تج دەپارتامەنتى، اپاتتار مەديسيناسى ورتالىعى، "قازمۇنايتەڭىز" ءموقق، "قتج" ۇق اق 30 ادامنان تۇراتىن كۇشتەر مەن قۇرالدار، 7 تەحنيكا جانە 1 ءورت پويىزى جىبەرىلدى.

ءورتتىڭ باسقا ۆاگوندارعا تارالۋىنا جول بەرمەۋ ماقساتىندا باگاج ۆاگونى جولاۋشىلار ۆاگونىنان اجىراتىلدى.

ءورت سالدارىنان 5 ادام، ونىڭ ىشىندە 1 بالا ءتۇرلى دارەجەدەگى كۇيىك الدى. بارلىق زارداپ شەككەندەر جۇك ۆاگونىندا بولعان. زارداپ شەككەندەر بەينەۋ اۋىلىنداعى ورتالىق اۋرۋحاناعا جەتكىزىلدى.

قولدا بار دەرەككە ساي ءورتتىڭ شىعۋنا جۇك ۆاگونىنداعى گاز باللونىنىڭ جارىلۋى سەبەپ بولعان.

ساعات 07.19-دا ءورت ءسوندىرىلدى، جۇك ۆاگونى تولىعىمەن جانىپ كەتتى.

قازىرگى ۋاقىتتا ىشكى ىستەر ورگاندارىنىڭ كۇشى ورتەنگەن ۆاگون قورشالدى، سونداي-اق ءورتتىڭ سەبەپتەرى مەن ءمان-جايلارىن انىقتاۋ ءۇشىن ماڭعىستاۋ وبلىسى تج دەپارتامەنتىنىڭ زەرتتەۋ ءورت ءسوندىرۋ زەرتحاناسى جىبەرىلدى.

ساعات 09.18-تە جولاۋشىلار ۆاگوندارى اقتوبە ستانسياسىنا جىبەرىلدى.