ەندىگى جەردەن باستاپ قازاقستان ازاماتتارىنىڭ ءتولقۇجاتتارىنا ق ر پرەزيدەنتى نۇرسۇلتان نازاربايەۆتىڭ سوزدەرى جازىلاتىن بولادى. بۇل تۋرالى «قامشى» پورتالى Tengrinews.kz-كە سىلتەمە جاساي وتىرىپ حابارلايدى.

مۇنداي نورما بۇگىن ق ر ءماجىلىسى وتىرىسىندا "جەكە باستى كۋالاندىراتىن قۇجاتتار تۋرالى" قازاقستان رەسپۋبليكاسى زاڭىنىڭ جوباسى تۋرالى" زاڭ جوباسىن تالقىلاۋ بارىسىندا قابىلدانعان.

"بۇل - رەسپۋبليكانىڭ "جەكە باستى كۋالاندىراتىن قۇجاتتار تۋرالى" زاڭىنا قوسىمشالار ەنگىزۋ تۋرالى زاڭ جوباسى. زاڭ جوباسىنىڭ ماقساتى - "ماڭگىلىك ەل" جالپىۇلتتىق پاتريوتتىق يدەياسىنىڭ نەگىزگى نورمالارى مەن قۇندىلىقتارىن ەنگىزۋ. قۇجاتتا "جەكە باستى كۋالاندىراتىن قۇجاتتار تۋرالى" زاڭىنا، ناقتىراق ايتساق، رەسپۋبليكا ازاماتىنىڭ پاسپورتىنا تۇڭعىش پرەزيدەنت، ۇلت كوشباسشىسىنىڭ تاۋەلسىزدىك جايلى ءسوزى، سونىمەن قاتار، رەسپۋبليكا ازاماتىنىڭ جەكە كۋالىكتى الۋى كەزىندە انت بەرۋگە مىندەتتەۋدى قاراستىرادى"، - دەپ حابارلادى ءماجىلىس وتىرىسىندا راحمەت مۇقاشيەۆ. 

جازعى دەمالىستان كەشە ورالعان ق ر پارلامەنتىنىڭ قوس پالاتاسى دا جۇمىستارىنا بەل شەشە كىرىسىپ كەتكەنگە ۇقسايدى. بۇگىن پارلامەنتتىڭ تومەنگى پالاتاسىنىڭ قاراۋىنا 40-تان اسا زاڭ جوباسى كەلىپ تۇسكەن. ولاردىڭ ءبىرقاتارى جاڭا زاڭ جوبالىرى مەن زاڭ جوبالارىنىڭ قوسىمشالارى بولسا، قالعاندارى  بۇرىننان قوردالانىپ قالعان ماسەلەلەر. 

«كەڭشىلىگى كوپ ەلباسى كەمشىلىگى كوپ پارلامەنتتىڭ بۇل ۇسىنىسىنا قانداي كوزقاراس بىلدىرەدى ەكەن»،- دەگەن سۇراۋ ءاربىر قازاقستاندىقتىڭ كوكەيىندە. وسى ۋاقىتقا دەيىن ۇكىمەتكە ايتىلعان وتكىر سىن مەن وزەكتى ماسەلەلەردى شەشۋدە اسا ىجداھاتتىلىق تانىتا قويمايتىن پارلامەنتتىڭ تومەنگى پالاتاسى دەپۋتاتتارى «ماڭگىلىك ەل» يدەياسىن ناسيحاتتاۋدىڭ تاعى ءبىر جولى - ونى  ءاربىر قازاقستاندىقتىڭ ءتولقۇجاتىنا تاڭبا ەتىپ باسىپ بەرۋ دەپ ۇقسا كەرەك.

ءيا، جاسىراتىنى جوق، ءتورتىنشى سەسسيا كەزىندە جىلدام سويلەۋدى ۇيرەنگەن دەپۋتات مىرزالار جازعى دەمالىستان ورالدى. ەندى ولاردا تىڭ سەرپىن بار. ولاردان تىڭ جوبالار كۇتكەن حالىق ءوز قالاۋلىلارىنا ءالى سەنەدى. سەبەبى، وتكەن سەسسيا بارىسىندا ءماجىلىس -41، سەنات 33 رەت جينالىپ، 500-گە تارتا ماسەلەنى قاراپ، 10 مىڭعا جۋىق ۇسىنىس ەنگىزگەن. راس، بۇل دا وڭاي شارۋا ەمەس ەكەندىگى تۇسىنىكتى.

ەندەشە، سول قابىلدانعان زاڭدار مەن زاڭ جوبالارىنىڭ ىشىندە حالىق يگىلىگى ءۇشىن قابىلدانعانىنىڭ قايسى ءبىرىن ءسىز ەسىڭىزدە  ساقتاپ قالا الدىڭىز؟

ەسەسىنە ەندى ۇمىتپايتىن بولاسىز. پارلامەنتتەگى حالىق قالاۋلىلارى ەنگىزگىن بۇل ۇسىنىس سىزگە ءومىر باقيلىق ءوز جۇمىسىنىڭ ناتيجەسىن كورسەتىپ تۇراتىن بولادى. پيسسيميتىك كوزقاراسپەن قاراعاندا ءپاتۋاسىز ۇسىنىس بولىپ كورىنۋى مۇمكىن. الايدا بۇل  مەملەكەتتىك يدەولوگيالىق ساياسات. ونسىز مۇلدە بولمايدى. قۇپتارلىق باستاما شىعار، بالكىم؟ باستاماشىل مەملەكەت باسشىسىنىڭ جاساقتاعان كومانداسىنداعى باستاماشىل دەپۋتاتتاردان مۇنداي كۇرت جاڭاشىل ۇسىنىستى ەشكىم كۇتپەسە كەرەك-تى. جۇرت بۇل جاڭالىقتى قالاي قابىلدارلارىن بىلمەي، ابدىراپ قالعانى دا جاسىرىن ەمەس. قايتەمىز، «قازانشىنىڭ ءوز ەركى، قايدان قۇلاق شىعارسا» دەيمىز دە قويامىز.

ايتىڭىزدارشى، جۇرگەنىنەن تۇرعانى كوپ ۇكىمەت پەن پارلامەنت پرەزيدەنت مالىمدەمەسىنەن كەيىن وزدەرىن قامشىلاعان ءتۇرى مە، بۇل؟ ەستەرىڭىزدە بولسا، پرەزيدەنت نۇرسۇلتان ءابىش ۇلى «قازاقستانداعى پرەزيدەنتتىك باسقارۋدى السىرەتىپ، پارلامەنتتىك جانە ۇكىمەتتىڭ باسقارۋ جۇيەسىنە جۇيەلى تۇردە كوشۋىمىز كەرەك» دەگەن بولاتىن. ەندەشە جاڭا سەسسيانى جاڭاشىل جاڭالىقپەن باستاعان ماجىلىسمەندەر ەندىگى جەردە بەل شەشە كىرىسەتىن ۋاقىت جەتكەن. قامشى سۇيەتىن شابان اتتاي سىلبىر قيمىلدايتىن ۋاقىت كەلمەسكە كەتكەنىن ولار جاقسى تۇسىنسە كەرەك-تى.  ونىڭ ۇستىنە قولدان جاسالعان داعدارىس دارمەنسىزدىككە يتەرمەلەيتىنىن ەلباسىنىڭ ءوزى ايتقان بولاتىن.

جۇمىستارىنا جاڭا كىرىسە باستاعان پارلامەنتتىڭ تومەنگى پالاتاسىنىڭ سپيكەرى مەن ونىڭ دەپۋتاتتارىنا ءبىزدىڭ دە ءۇشبۋ ارىزىمىز جوق ەمەس. وتكەن سەسسيا مەن جاڭا سەسسيا دا قاراستىرىلعان 550-گە جۋىق زاڭ جوباسىنىڭ قانشا پايىزى مەملەكەتتىك تىلدە قاراستىرىلىپ، قانشاۋى قازاق تىلىندە ازىرلەندى؟ بۇل تەك وسى جولعى سەسسياعا قاراتا ايتىلعان ماسەلە مەس. تاۋەلسىزدكتىڭ شيرەك عاسىرىنا اياق باسساق تا مەملەكەتتىك تىلىمىزدە بىردە-بىر زاڭ جوباسىن ازىرلەي الماعانىمىز نە سوراقىلىق؟ بۇل دا ايتا، ايتا جاۋىر بولعان تاقىرىپ بولسا دا، زاڭ ءماتىنىن مەملەكەتتىك تىلدە ازىرلەۋ مينيسترلىكتەگى شەنەۋنىكتەر مەن دەپۋاتتار ءۇشىن سونشالىقتى قيىنشىلىق تۋدىراتىنى قالاي؟ حالىق بۇنى  قالاي ءتۇسىنۋى ءتيىس؟ ەسەسىنە، ەلدىڭ ەسىنە كىرىپ شىقپايتىن ۇسىنىستاردى قاۋعاداي قاۋلاتقاندا الدارىنا جان سالمايتىن حالىق قالاۋلىلارى وسى سەسسيا بارىسىندا ماسەلە ەتىپ كوتەرۋى ءتيىس بىرىنشە ءۋاجىمىز وسى بولار. بىزدەگى «اقساقال بيلىكتەگى» قالىپتاسقان ۇردىستەر بويىنشا ءىرىلى-ۇساقتى شەنەۋنىكتەر ۇپايدىڭ قامى ءۇشىن حالىقتىڭ قىنىنا تۇسەتىپ كەتەتىنىن اڭعارماسا كەرەك، ايتەۋىر جاعىمپازدىق جارىسىنا ىنتا-شىنتاسىمەن كىرىسۋدەن قاشقان ەمەس. جوعارىداعى ءبىز اتاپ وتكەن ماسەلە – پارمانەت پالاتالارىنىڭ بىرلەسكەن وتىرىسىندا كۇن تارتىبىندە قاراستىرىلۋى ءتيىس. سولاي بولۋى كەرەك تە! ونسىز دا زاڭدى بەلدەن باسىپ، ءوز ىڭعايىنا كوندىرۋ - ءبىزدىڭ شەنەۋىكتەردىڭ ادەتىنە اينالعانداي. كەمدىك كوپ، ءتىپتى كوزگە ۇرىپ-اق تۇر. ءبىراق سول كەم-كەتىكتى جونگە سالۋعا قۇلىق جوق.

نۇرگەلدى ءابدىعاني ۇلى