جاڭا تۋىلعان نارەستەلەردىڭ سارعايۋى وتە ءجيى كەزدەسەدى. ول ۆاكسينانى العان-الماعانىنا قاراماستان، نارەستەلەردىڭ 50-60% بولاتىن جايت. سابيلەردىڭ سارعايۋى قانداعى ءبيليرۋبيننىڭ جوعارى كونسەنتراسياسىنا بايلانىستى. بيليرۋبين، ءوز كەزەگىندە، ەريتروسيتتەردىڭ – قاننىڭ قىزىل بولشەكتەرىنىڭ تابيعي جويىلۋى ناتيجەسىندە ورىن الادى.
ەرەسەكتەردە بيليرۋبين باۋىر قىزمەتىمەن اعزادان شىعارىلادى، ءبىراق جاڭا تۋعان نارەستەلەردە بۇل ورگان ءالى تولىق قۋاتتا جۇمىس ىستەمەيدى جانە فەرمەنتتەر مولشەرى جەتكىلىكسىز بولادى. ناتيجەسىندە بيليرۋبين ولاردىڭ قانىندا جينالادى، بۇل تەرىگە سارعىش ءتۇس بەرەدى. بۇل رەتتە ءسابي ەشقانداي اۋرۋدى سەزىنبەيتىنىن اتاپ وتكەنىمىز ءجون.
ادەتتە، جاڭا تۋىلعان نارەستەلەردىڭ سارعايۋى 2-3 اپتادان كەيىن باسىلادى جانە ەمدەۋدى قاجەت ەتپەيدى.
ۆاكسيناسيانىڭ بۇل قۇبىلىسقا ەشقانداي قاتىسى جوق. قازاقستاننىڭ پەرزەنتحانالارىندا نارەستەلەر ەكى ءتۇرلى ۆاكسينا الادى: تۋبەركۋلەزگە قارسى جانە ب ۆيرۋستىق گەپاتيتىنە قارسى. ولار ادەتتە بالا دۇنيەگە كەلگەننەن كەيىن 1-4 كۇنى سالىنادى.
دارىگەرلەر ۆاكسينالاردىڭ جاڭا تۋعان نارەستەلەردە سارعايۋدىڭ دامۋىنا اسەرىن بىرنەشە رەت جوققا شىعارعان بولاتىن.
سونىمەن قاتار، فيزيولوگيالىق سارعايۋدىڭ بولۋى ۆ گەپاتيتىنە قارسى ۆاكسيناسيا جۇرگىزۋگە قارسى كورسەتىلىم بولىپ سانالمايدى.
دەمەك، ۆاكسيناسيا نارەستەلەردە سارعايۋدى تۋدىرۋى مۇمكىن دەگەن تۇجىرىمدارعا ەشقانداي نەگىز جوق جانە ماماندار ونى بىرنەشە رەت جوققا شىعاردى.
پىكىر قالدىرۋ