ءال-فارابي اتىنداعى قازۇۋ جۇڭگو ۇكىمەتىنىڭ گرانتى بويىنشا 10 ملن. دوللاردىڭ سۋپەركومپيۋتەرىن الاتىن بولدى. بۇل تۋرالى «قامشى» پورتالى حابارلايدى. ەلباسىنىڭ جۇڭگو حالىق رەسپۋبليكاسىنا جاساعان مەملەكەتتىك ساپارى بارىسىندا وسىنداي ۋاعدالاستىققا قول جەتكىزىلدى.

      ءبىر سەكۋندتا ءجۇز ون تريلليون وپەراسيانى(110 تفل) جۇزەگە اسىرا الاتىن سۋپەركومپيۋتەردى ەلىمىزدەگى جەتەكشى قازۇۋ-عا قىتايدىڭ «INSPUR» كومپانياسى بەرەدى. بۇعان ارنالعان گرانت قاراجاتى  جۇڭگو ۇكىمەتى تاراپىنان بولىنەدى.

    جۇڭگو ءتوراعاسى سي ءسزينپيننىڭ بيىلعى مامىر ايىندا قازاقستانعا جاساعان ساپارى بارىسىندا قازاقستان پرەزيدەنتى نۇرسۇلتان نازاربايەۆ ەكى ەل اراسىنداعى عىلىمي-تەحنيكالىق ىنتىماقتاستىقتى ودان ءارى دامىتۋ ماقساتىندا «Silicon Valley» مودەلى بويىنشا بىرلەسكەن IT- تەحنولوگيالىق پاركىن قۇرۋدى ۇسىندى.

مەملەكەت باسشىسىنىڭ يدەياسىن ىسكە اسىرا وتىرىپ، قازۇۋ جاڭا جىبەك جولى ۋنيۆەرسيتەتتەر اليانسىنىڭ حالىقارالىق  IT-تەحنوپاركىن قۇرۋ جونىندە باستاما كوتەردى. ول قازۇۋ بازاسىندا سۋپەركومپيۋتەر جانە بۇلت  ارقىلى زەرتتەۋ نەگىزىندە قۇرىلادى. 

ەلباسى ن. نازاربايەۆتىڭ  قىتايعا مەملەكەتتىك ساپارى بارىسىندا ءال-فارابي اتىنداعى قازۇۋ مەن «INSPUR» كومپانياسىنىڭ جەتەكشىلەرى  ىنتىماقتاستىق تۋرالى مەموراندۋمعا قول قويدى. بۇل قۇجاتتا جوبانى ىسكە  اسىرۋ بويىنشا بىرلەسكەن ىس-ارەكەتتىڭ نەگىزگى باعىتتارى بەلگىلەندى.

اتاپ وتكەن ءجون،  قازۇۋ  يندۋستريالدىق- يننوۆاسيالىق   دامۋ جونىندەگى مەملەكەتتىك  باعدارلاما بويىنشا  قازۇۋ  اقپاراتتىق  كوممۋنيكاسيالىق  تەحنولوگيالار سالاسىنداعى        جوعارى  بىلىكتى ماماندار  دايىندايتىن ورتالىق رەتىندە  تاڭدالدى. بۇل ءۇشىن ق ر  ينۆەستيسيالار جانە  دامۋ جونىندەگى مينيسترلىكپەن بىرلەسىپ،   بىرەگەي «تەحنولوفت»  يننوۆاسيالىق كلاستەر  قۇرىلىپ جاتىر. اتالعان كلاستەر  يننوۆاسيالىق شەبەرحانالارى مەن  وزەگى  سۋپەركومپيۋتەر  بولىپ تابىلاتىن  IT - تەحنوپاركتى  قامتيدى.

 قازاقستان مەن قىتايدىڭ  اقپاراتتىق-كوممۋنيكاسيالىق تەحنولوگيالار  سالاسىنداعى ىنتىماقتاستىقتى  تەرەڭدەتە  ءتۇسۋى عىلىم مەن ءبىلىم  سالاسىنداعى  مەملەكەتارالىق  قارىم-قاتىناستى  جاڭا دەڭگەيگە كوتەرەدى. شانحاي  ىنتىماقتاستىعى ۇيىمىنا  مۇشە ەلدەردىڭ عىلىمي-تەحنيكالىق ءوزارا  ىقپالداستىعى  شەڭبەرىندە  بىرلەسكەن زەرتتەۋ  جوبالارىن جۇزەگە  اسىرۋدىڭ  مۇمكىندىگىن كەڭەيتەدى.  سونىمەن قاتار بۇل قازاقستان پرەزيدەنتىنىڭ  «نۇرلى جول – بولاشاققا باستار جول»  جولداۋىمەن  ۇندەسەتىن  جاڭا  جىبەك جولى  ەكونوميكالىق بەلدەۋىن  قۇرۋ جونىندەگى مەملەكەتارالىق  اۋقىمدى جوبانى  جۇزەگە اسىرۋعا  ءوز ىقپالىن تيگىزەدى.