قۇرامىندا جەرلەسىمىز ايدىن ايىمبەتوۆ، رەسەيلىك عارىشكەر گەنناديي پادالكا مەن دات استروناۆتى اندرەاس موگەنسەن بار «سويۋز تما-16م» عارىش كەمەسىنىڭ حالىقارالىق ەكيپاجىن استانادا نۇرسۇلتان نازاربايەۆ قارسى الۋى مۇمكىن. بۇل تۋرالى «قامشى» پورتالى BNews.kz-كە سىلتەمە جاساي وتىرىپ حابارلايدى.

Nur.kz سايتىنىڭ جازۋىنشا، «قازعارىش تاراپىنان حابارلاما كەلىپ ءتۇستى، وعان سايكەس قازاقستاننىڭ ءبىرىنشى تۇلعاسى – پرەزيدەنت ەكيپاجدى ءوزى قارسى الۋعا نيەت بىلدىرگەن، وسىعان سايكەس قوسىمشا مىندەتتەر قويىلىپ، ەكى ساعات ون مينۋت قوسىمشا ۋاقىت ءبولىندى – قونۋ ورنىنان استاناعا دەيىن جەتكىزۋ ءۇشىن. وسى باعىتتا عانا وزگەرىستەر ەنگىزىلىپ وتىر، ادەتتە ءبىز ەكيپاجدى قاراعاندىدا قارسى الاتىن ەدىك، وندا ەكيپاجدى قارسى الۋعا قاتىستى شاعىن ءىس-شارا ۇيىمداستىرىلىپ، دارىگەرلەر ولاردىڭ حال-احۋالىن تەكسەرىپ، ەكيپاجدىڭ بريفينگكە قاتىسۋ-قاتىسپاۋ جاعدايىن باعالايتىن بولادى. ەگەر وعان مۇرشالارى كەلسە، شاعىن بريفينگ وتكىزىلەدى دە، سول جەردەن ەكيپاج مۇشەلەرى ءوز بازالارىنا اتتانادى»، – دەپ حابارلادى جۋرناليستەرگە بەرگەن سۇحباتىندا رەسەي اۋە كولىكتەرى فەدەرالدىق اگەنتتىگى باسشىسىنىڭ ورىنباسارى الەكساندر ۆەدەرنيكوۆ.

ول سونداي-اق ەكيپاجدى استانادا قارسى الۋ عارىشكەرلەر تاريحىندا ەكىنشى رەت ورىن العالى وتىرعانىن تىلگە تيەك ەتتى.

سونىمەن قاتار قازاقستاندىق عارىشكەر ايدىن ايىمبەتوۆتى قونعان جەرىنەن تۋعان-تۋىستارى، 17 جاستاعى ۇلى ءامىر مەن باۋىرى قارسى الاتىنىن اتاپ ءوتتى.

«سويۋز تما-16م» عارىش كەمەسىنىڭ جەرگە قونۋى جەزقازعاننان وڭتۇستىك-شىعىسقا قاراي 146 شاقىرىم جەردە 2015 جىلى 12 قىركۇيەكتە ساعات 6.51-گە جوسپارلانعان.

نۇرزات توعجان