باتىس قازاقستان وبلىسى ءبورلى اۋدانى اقساي قالاسىنىڭ تۇرعىنى تيمۋر بازاروۆ الەۋمەتتىك جەلىدە ماسكا كيمەگەن دارىگەرلەردىڭ ۆيدەوسىن جاريالادى، دەپ حابارلادى موي گورود سايتى. 

سايت مالىمەتىنشە، وقيعا 16 ناۋرىزدا بولعان. ۆيدەودا ءبورلى اۋداندىق اۋرۋحاناسىنا كەلگەن تيمۋر بازاروۆ اناسىنىڭ سول مەديسينا مەكەمەسىندە ەكەنىن ايتقان. 

– بۇل ۆيدەونى ءوزىم ءتۇسىردىم. تەراپيەۆتەر دۇرىستاپ تۇسىندىرە المادى. انام ينسۋلتپەن اۋىرىپ تۇرسا دا، اۋرۋحانادان شىعارعىلارى كەلدى. سونداي-اق ناۋقاسپەن دورەكى سويلەستى، – دەيدى تيمۋر بازاروۆ.

الەۋمەتتىك جەلى قولدانۋشىلارى ۆيدەونى قىزۋ تالقىلاپ، پوستتىڭ استىندا جۇزدەگەن پىكىر قالدىرعان.

– وسى سەبەپتى ءبىز قىزىل ايماقتا تۇرمىز. ويتكەنى دارىگەرلەرگە ءبارىبىر، ماسكا رەجيمى ساقتالمايدى جانە اراقاشىقتىق تا ساقتامايدى، – دەپ جازدى نينا سۋدارۋشكينا.

–  مەديسينا مەكەمەلەرىندە ۆيدەو تۇسىرۋگە تىيىم سالۋ تۋرالى زاڭدى نەگىزدە بۇيرىق بار. مەديسينا قىزمەتكەرلەرىمەن دورەكى قارىم-قاتىناس ءۇشىن ول دا جازالانادى، – دەدى تاعى ءبىر كوممەنتاتور.

دەنساۋلىق ساقتاۋ باسقارماسى بۇل وقيعاعا قاتىستى تۇسىنىكتەمە بەردى.

–  ەكى مەديسينا قىزمەتكەرىنىڭ بەتپەردە تاقپاعاندارى انىقتالدى. ولارعا تارتىپتىك جازا قولدانىلادى. ءبىراق دارىگەرلەردى ۆيدەوعا تۇسىرۋگە تىيىم سالىنعان، – دەدى وبلىستىق دەنساۋلىق ساقتاۋ باسقارماسىنىڭ باسشىسى ارمان قاليبەكوۆ.