ءبىرىڭعاي جيناقتاۋشى زەينەتاقى قورى تولەم الۋعا ءوتىنىش بەرمەگەن زەينەتكەرلەردى ىزدەستىرىپ جاتىر. بۇل تۋرالى قوردىڭ باسپا ءسوز قىزمەتى حابارلادى.
2018 جىلى 11 قازاننان باستاپ زەينەتكەرلىك جاسقا تولۋعا بايلانىستى ءبىرىڭعاي ءوتىنىش بەرۋگە بولاتىن "ءبىر تەرەزە" قاعيداتى بويىنشا كومپوزيتتىك قىزمەت ەنگىزىلگەن. ونىڭ اياسىندا زەينەتكەرلىك جاسقا تولعان الۋشى ءبىرىڭعاي وتىنىشپەن جانە قۇجاتتار توپتاماسىمەن مەملەكەتتىك كورپوراسيا ياعني حقو-عا جۇگىنەدى.
"الايدا بجزق اقپاراتتىق جۇيەلەرىندە قوردان تولەمدەر جۇزەگە اسىرىلمايتىن 200 مىڭنان اسا شوت (200 160) بار. بۇل رەتتە زەينەتكەرلىك جاسقا جەتكەن ازاماتتار بيۋدجەتتەن قاراجاتتارىن الىپ جاتىر. ولاردىڭ كوپشىلىگى زەينەتكەر قاتارىنا 2018 جىلدىڭ 11 قازانىنا دەيىن قوسىلعان.
بجزق سالىمشىلاردىڭ دەرەكتەرىن سايكەستەندىرۋ بويىنشا جۇمىستار جۇرگىزىپ، 2021 جىلعى 1 ساۋىردەن باستاپ قوردان تولەمدەر جۇزەگە اسىرىلاتىن تۇلعالاردىڭ ءتىزىمىن جاساقتادى. ەندى وسى ساناتتا بار ادامداردىڭ تەلەفون نومىرلەرىنە (ول ءموبيلدى ازاماتتار بازاسىندا تىركەلۋى ءتيىس) بجزق-دان زەينەتاقى تولەمدەرىن تاعايىنداۋ بويىنشا بەلسەندى قىزمەت كورسەتۋ ۇسىنىلعان sms-حابارلاما جولدانادى" دەلىنگەن حابارلامادا.
كەلىسىم الىنعاننان كەيىن بۇل ازاماتتارعا بجزق-دان تولەمدەر مەملەكەتتىك كورپوراسياعا الۋشىلاردىڭ جاسىنا بايلانىستى زەينەتاقى تولەمدەرى مەن مەملەكەتتىك بازالىق زەينەتاقى تولەمدەرىن تاعايىنداۋ كەزىندە ۇسىنعان بانك شوتتارىنا جىبەرىلەتىن بولادى.
زەينەتاقى تولەمدەرىن جۇزەگە اسىرۋ قاعيدالارىنىڭ ەرەجەلەرىنە سايكەس بجزق-دان مىندەتتى زەينەتاقى جارنالارى مەن مىندەتتى كاسىپتىك زەينەتاقى جارنالارى ەسەبىنەن زەينەتاقى تولەمدەرى اي سايىن بەلگىلەنگەن كەستە بويىنشا جۇزەگە اسىرىلادى.
پىكىر قالدىرۋ