وسى اپتا بويى اقمولا، قوستاناي، سقو وبلىستارىنىڭ اكىمدەرى سەرگەي كۋلاگين، نۇرالى ءسادۋاقاسوۆ جانە ەرىك سۇلتانوۆتار 29 تامىز كۇنى اقمولا وبلىسى زەرەندى اۋىلىنداعى ساۋناعا بۇكىل تەاتر ترۋپپاسىن شاقىرىپ، ساۋنا-شوۋ جاساعانى تۋرالى الەۋمەتتىك جەلىلەردە قىزۋ تالقىلاۋ ءجۇردى.  اتالمىش وبلىستىڭ اكىمدەرىنىڭ ارەكەتىنە كەشە باسپا ءسوز قىزمەتى تۇسىنىكتەمە بەرگەن ەدى. الايدا وسى اقپاراتتى Facebook-تەگى جەكە پاراقشاسىنا جازعان داۋلەت قۋانىشبايەۆقا  قىسىم جاسالىپ جاتسا كەرەك. بۇل تۋرالى «قامشى» پورتالى radiotochka.kz سايتىنا سىلتەمە جاساي وتىرىپ حابارلايدى. داۋلەت كۇشتىك قۇرىلىمدار تاراپىنان جاسالعان قىسىمعا قارسى اشتىق جاريالاعان.

“مەن كىمدەرمەن قارسى شىعىپ وتىرعانىمدى ءبىلدىم جانە ادىلەتسىزدىك پەن زاڭسىزدىقتان شارشادىم»، – دەپ جازادى داۋلەت Facebook-تەگى جەكە پاراقشاسىنا.

«ءقازىر مەنىڭ وتباسىما قىسىم جاسالىپ وتىر. اقمولا وبلىستىق ىشكى ىستەر باسقارماسى اتباسار ءاىىب ارقىلى اعام سەرىك (ءتۇپنۇسقادا وسىلاي جازىلعان) قۋانشبايەۆقا باقىلاۋ كۇشەيتىلدى. سىزدەر وتباسىمنىڭ باسىن قاتەرگە تىگىپ وتىرعان مەنەن «نە ويىم بارلىعىن» سۇراپ وتىرسىزدار. ونسىز  دا وسىندا كوپ ادامدار ءبىزدىڭ اكىمدەر قانداي «مۇباراك» ادام ەكەنىن، ونىڭ كەلبەتى قوستانايداعى شىركەۋلەردىڭ بىرىندە ىلىنگەنىن ايتىپ جاتىر. سولاي، ونىڭ ماشيناسى ءالى ساقىلداپ تۇر»، – دەيدى ول جازباسىندا.

داۋلەت قۋانىشبايەۆ ءوزىنىڭ ءسوزىن دالەلدەيتىن اۋديو-جازبا بار ەكەنىن دە ايتىپ ءوتىپتى. سونىمەن قاتار داۋلەت  ول فايلدى انتيكوررۋپسيالىق مەديا ورتالىققا وتكىزگەنىن دە جەتكىزدى.

قۋانىشبايەۆتىڭ ايتۋىنشا  ساۋناداعى قويىلىم جايلى تەاتر ارتىستەرى دە بار شىندىقتى جەتكىزۋگە دايىن ەكەن. ءبىراق ولاردىڭ ءوز تالاپتارى بار كورىنەدى. ارتىستەر مۇنداي تۇسىنىكسىز ءىس-ساپارلاردىڭ ءبىرىنشى رەت بولىپ وتىرماعانىن، سوندىقتان كۇش قۇرىلىمدارى تاراپىنان قىسىم جاسالماسا، بارلىق جايدى ايتىپ بەرۋگە دايىن وتىرعاندىقتارىن جەتكىزگەن.

داۋلەتتىڭ Facebook-تەگى سوڭعى جازباسىندا اشتىقتى توقتاتاتىنى تۋرالى جازىلىپتى. ول اتالمىش الەۋمەتتىك جەلىدەگى دوستارىنىڭ ءبىرىنىڭ كومەگى تيگەندىگىن، ەندى كەرىسىنشە كۇش جيناۋ قاجەتتىگىن جازىپتى.

نۇراي ءالجان