بقو-دا ءورت ءسوندىرۋ ءبولىمىنىڭ باسشىسى قايتىس بولدى، دەپ حابارلادى "ۋرالسكايا نەدەليا" باسىلىمى.

سايت مالىمەتىنشە، اقجايىق اۋدانى قاراۋىلتوبە اۋىلىندا ورنالاسقان №27 ءورت ءسوندىرۋ ءبولىمىنىڭ باسشىسى اقان نۇرعالييەۆ اياۋسىز سوققىعا جىعىلىپ، كوز جۇمعان.

وقيعا 25 ناۋرىزدا بولعان. مارقۇمنىڭ باۋىرى رۋسلان نۇرعالييەۆتىڭ ايتۋىنشا، اقاندى ساعات 23:00 شاماسىندا ارىپتەستەرى جۇمىسقا شاقىرعان.

– اعامدى جۇمىسقا نە ءۇشىن شاقىرعانىن بىلمەيمىن. ءورت ءسوندىرۋ بولىمىندە ەكى ءورت سوندىرۋشىدەن باسقا تاعى ەكى بوتەن ادام بولعان. بارلىعى ماس ەدى. مەن قانداي جانجال بولعانىن، كىم كىمدى ۇرعانىن بىلمەيمىن. ءبىراق مەنىڭ اعامدى اياۋسىز سوققىعا جىققان. ءورت ءسوندىرۋ بولىمىندە ايعاقتاردى جاسىرۋ ءۇشىن كامەرالاردى سىندىرعان.

كەلەسى كۇنى اعامنىڭ دەنەسى اۋىلدىڭ شەتىندە تۇراتىن باسقا اعامنىڭ سارايىنان تابىلدى. جەڭگەم تاڭەرتەڭ بىرەۋدىڭ سارايدا جاتقانىن كورىپ، مەنىڭ اعام ەكەنىن تانىعان. بۇل تۋرالى بىزگە دەرەۋ حابارلاپ، جەدەل جاردەم شاقىردى. اعامدى بىردەن اۋداندىق اۋرۋحانانىڭ جانساقتاۋ بولىمىنە جاتقىزدى. الايدا ول 27 ناۋرىزدا تاڭعى ساعات 5:00-دە قايتىس بولدى. ارتىندا ءۇش بالاسى جەتىم قالدى، – دەيدى رۋسلان نۇرعالييەۆ.

ول اعاسىنىڭ ولىمىنە كىنالىلەر جازاسىز قالۋى مۇمكىن دەپ الاڭدايدى.

بقو پوليسيا دەپارتامەنتىنىڭ باسپا ءسوز قىزمەتى بۇل ءىس بويىنشا قىلمىستىق كودەكستىڭ 106-بابىنىڭ 1-تارماعى (دەنساۋلىققا قاساقانا اۋىر زيان كەلتiرۋ) بويىنشا سوتقا دەيىنگى تەرگەۋ جۇرگىزىلگەنىن حابارلادى.

"2021 جىلدىڭ 25 ناۋرىزىندا ساعات 23:00 شاماسىندا قاراۋىلتوبە اۋىلىنىڭ تۇرعىندارى 1992 جىلى تۋعان ن. مەن م.اراسىندا جانجال شىعىپ، توبەلەس بولادى. 26 ناۋرىزدا ساعات 08:30 شاماسىندا ن. اعاسىنىڭ ءۇيىنىڭ جازعى سارايىنان ەس-تۇسسىز كۇيدە تابىلدى جانە جەدەل جاردەم كولىگىمەن اقجايىق اۋداندىق اۋرۋحاناسىنا جەتكىزىلدى. 27 ناۋرىزدا ساعات 05:46-دا اۋرۋحانانىڭ حيرۋرگيا بولىمىنەن ونىڭ جاراقاتتان قايتىس بولعانى تۋرالى حابارلاما كەلىپ ءتۇستى. جابىرلەنۋشىنىڭ قايتىس بولۋىنا بايلانىستى ءىس قىلمىستىق كودەكستىڭ 106-بابى 3-بولىگى بويىنشا قايتا قارالدى. كۇدىكتى م. قاماۋعا الىنىپ، ۋاقىتشا ۇستاۋ يزولياتورىنا قامالدى" دەلىنگەن پوليسيا دەپارتامەنتىنىڭ حابارلاماسىندا.