ق ر پرەزيدەنتى نۇرسۇلتان نازاربايەۆ رەسمي ىس-ساپارمەن دۋشانبە قالاسىنا كەلدى. ءوزىنىڭ قازاقستاندىق ارىپتەسى نۇرسۇلتان نازاربايەۆتى تاجىكستان رەسپۋبليكاسىنىڭ پرەزيدەنتى ەمومالي راحمون كوحي ميللات ۇلتتار سارايىندا قارسى العان.بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.
ەلباسى نۇرسۇلتان نازاربايەۆتىڭ تاجىكستانداعى ساپارى بارىسىندا وتكىزىلەتىن جوسپارلارى تومەندەگىدەي بولماق:
- مەملەكەت باسشىسىنىڭ ساپارى بارىسىندا بۇگىن، 14 قىركۇيەكتە تاجىكستان پرەزيدەنتى ە. راحمونمەن شاعىن جانە كەڭەيتىلگەن قۇرامدا كەلىسسوزدەر جوسپارلانعان.
- تاراپتار ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلايدى.
- بۇدان باسقا، ەلباسىنىڭ تاجىكستان رەسپۋبليكاسى جوعارى جينالىس وكىلدەرى پالاتاسىنىڭ ءتوراعاسى ش. زۋحۋروۆپەن كەزدەسۋى جوسپارلانىپ وتىر.
كەلىسسوز قورىتىندىسى بويىنشا ءبىرقاتار قۇجاتتارعا قول قويۋ جوسپارلانۋدا.
- اتاپ ايتقاندا: ق ر مادەنيەت جانە سپورت مينيسترلىگى مەن تاجىكستان رەسپۋبليكاسى ۇكىمەتىنىڭ جانىنداعى جاستار ىستەرى، سپورت جانە تۋريزم كوميتەتى اراسىندا دەنە شىنىقتىرۋ جانە سپورت سالاسىنداعى ىنتىماقتاستىق تۋرالى كەلىسىم؛
- قازاقستان رەسپۋبليكاسى سىرتقى ىستەر مينيسترلىگى مەن تاجىكستان رەسپۋبليكاسى سىرتقى ىستەر مينيسترلىگى اراسىنداعى ىنتىماقتاستىقتىڭ 2016-2017 جىلدارعا ارنالعان باعدارلاماسى؛
- قازاقستان رەسپۋبليكاسى مەن تاجىكستان رەسپۋبليكاسى ۇكىمەتتەرى اراسىنداعى قازاقستان رەسپۋبليكاسىنىڭ ەڭبەك ەتىپ جاتقان ميگرانتتارى، ازاماتتارى، تاجىكستان رەسپۋبليكاسىندا ۋاقىتشا جۇمىس ىستەيتىندەردىڭ ەڭبەك قىزمەتى مەن ولاردىڭ قۇقىقتارىن قورعاۋ تۋرالى، تاجىكستان رەسپۋبليكاسىنىڭ ەڭبەك ەتىپ جاتقان ميگرانتتارى، ازاماتتارى، قازاقستان رەسپۋبليكاسىندا ۋاقىتشا جۇمىس ىستەيتىندەردىڭ ەڭبەك قىزمەتى مەن ولاردىڭ قۇقىقتارىن قورعاۋ تۋرالى 2006 جىلعى 4 مامىرداعى كەلىسىمگە وزگەرىستەر ەنگىزۋ تۋرالى حاتتاما؛
- قازاقستان رەسپۋبليكاسى ۇكىمەتى جانە تاجىكستان رەسپۋبليكاسى ۇكىمەتى اراسىنداعى ءبىلىم سالاسىنداعى ىنتىماقتاستىق تۋرالى 2000 جىلعى 13 ماۋسىمداعى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتاما؛
- قازاقستان رەسپۋبليكاسى ۇكىمەتى مەن تاجىكستان رەسپۋبليكاسى ۇكىمەتى اراسىنداعى اقپاراتتى تەحنيكالىق قورعاۋ سالاسىنداعى ىنتىماقتاستىق تۋرالى كەلىسىم؛
- قازاقستان رەسپۋبليكاسى مەن تاجىكستان رەسپۋبليكاسى اراسىنداعى ستراتەگيالىق ارىپتەستىك تۋرالى شارت.
ايتا كەتەيىك، ەكىجاقتى ىنتىماقتاستىقتى قامتيتىن 80-گە جۋىق قۇجات بار. قازاقستان مەن تاجىكستان اراسىنداعى ساۋدا اينالىمى 2014 جىلدىڭ قاڭتار-جەلتوقسان ايلارىندا 700،4 ملن دوللاردى قۇرادى. ال 2015 جىلدىڭ ءبىرىنشى جارتى جىلدىعىندا 299،2 ملن دوللار بولدى. بۇل وتكەن جىلعى سايكەس كەزەڭمەن سالىستىرعاندا 7،9 پايىزعا تومەن. 2014 جىلدىڭ ءبىرىنشى جارتى جىلدىعىندا 325 ملن دوللارعا جەتكەن ەدى.
قازاقستان تاجىكستانمەن اراداعى سىرتقى ساۋدا كولەمى جاعىنان تۇراقتى تۇردە رەسەيدەن كەيىنگى ەكىنشى ورىن الادى.
قازاقستان ءۇشىن ىنتىماقتاستىقتىڭ باسىمدىقتى باعىتتارى - تاۋ-كەن ونەركاسىبى، ءتۇستى مەتاللۋرگيا، ماشينا قۇرىلىسى، ەنەرگەتيكا، تاماق ونەركاسىبى، كولىك جانە كوممۋنيكاسيا، اۋىل شارۋاشىلىعى سالالارى.
ەرتەڭ، 15 قىركۇيەكتە ق ر پرەزيدەنتى ۇقشۇ ۇجىمدىق قاۋىپسىزدىك كەڭەسىنىڭ (ۇقك) مەملەكەت باسشىلارى دەڭگەيىندەگى سەسسياسىنا قاتىسادى.
"قامشى"سىلتەيدى
