ماڭعىستاۋ وبلىسى مۇنايلى اۋدانىنىڭ تۇرعىنى اسىل قالەنوۆ بەس جىلدان بەرى كونديتەر ونىمدەرىن شىعارۋمەن اينالىسىپ كەلەدى. كاسىپكەردىڭ شىعارعان تاتتىلەرى تەك مۇنايلىلىقتارعا عانا ەمەس، وزگە ءوڭىر تۇرعىندارىنا دا تانىلىپ ۇلگەرگەن. تاۋلىگىنە 250-300 كەلى كونديتەر ءونىمىن شىعاراتىن كاسىپكەر تاتتىلەردى اتىراۋ، اقتوبە، جاڭاوزەن قالاسىنا جىبەرەدى.

– بەس جىل بۇرىن وسى كاسىپتى باستاعان ەدىم. العاشىندا شي باۋىرساقتاردى ساتىلىمعا شىعاردىق. سۇرانىس جاقسى بولدى. ءقازىر پەچەنە، ۆافلي، چاك-چاك سىندى تاتتىلەردى دە پىسىرەمىز. قازىرگى ۋاقىتتا 8 ادامدى جۇمىسپەن قامتىپ وتىرمىن. بارلىعى وسى اتامەكەن اۋىلىنىڭ تۇرعىندارى، – دەدى كاسىپكەر.

اسىل امانتاي ۇلى شىعارعان ءونىمنىڭ بارلىعى تابيعي تازا ونىمنەن جاسالادى. ياعني، ەشقانداي بوياۋىشتار مەن حيميا جوق. باستىسى گمو-سىز ءونىم.

– كاسىبىمدى باستاعاندا سەحتى جالعا العان ەدىم. بىلتىر «نۇر كاپيتال» باعدارلاماسى اياسىندا 30 ملن تەڭگە نەسيە الىپ، ونىڭ 15 ملن تەڭگەسىن جەكە سەح سالۋعا جۇمسادىق. 15 ملن تەڭگەگە جاڭا تەحنيكا ساتىپ الدىق. ءقازىر سەحتىڭ قۇرىلىس جۇمىسى اياقتالدى. تەك ەلەكتر جۇيەسىن قوسۋ قالدى. وسى جۇمىس اياقتالسا جاڭا سەحقا قونىس اۋدارامىز. ول دا قازىرگى اتامەكەن اۋىلىندا ورنالاسقان، – دەدى اسىل 

كاسىپكەر ءۇشىن قىزمەتكەرلەرىنىڭ قولىنداعى ديپلومى ماڭىزدى ەمەس. جۇمىسقا ىنتاسى بار جانداردى جانىنا جيعان. كومانداسىنىڭ بىلىكتىلىگىن ارتتىرۋدى دا ۇمىت قالدىرماعان. قازىرگى پاندەميا كەزىندە رەسەي ەلىنىڭ، الماتى قالاسىنىڭ تاجىريبەلى تەحنولوگتارىنان ونلاين شەبەرلىگىن ارتتىرىپ وتىر.