قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ توراعالىعىمەن "سامۇرىق-قازىنا" ۇلتتىق ءال-اۋقات قورىن باسقارۋ جونىندەگى كەڭەستىڭ وتىرىسى ءوتتى. بۇل تۋرالى elbasy.kz سايتى حابارلادى.
جيىندا كەڭەس شەشىمدەرىنىڭ ورىندالۋ ناتيجەلەرى بويىنشا باياندامالار تىڭدالىپ، قوردىڭ بولاشاق ينۆەستيسيالىق جوبالارىنىڭ باعىتتارى تالقىلاندى.
"نۇرسۇلتان نازاربايەۆ "سامۇرىق-قازىنا" ۇلتتىق ءال-اۋقات قورى" اكسيونەرلىك قوعامى باسقارماسىنىڭ ءتوراعاسى ا.ساتقالييەۆتىڭ اقپاراتىن تىڭداي كەلە، قور جۇمىسىنا وڭ باعا بەردى. دۇنيەجۇزىلىك داعدارىستىڭ قازاقستان ەكونوميكاسىنا اسەرىنە قاراماستان، قور 2020 جىلدى تابىستى اياقتاعانى ايتىلدى.
كەڭەس مۇشەلەرى "سامۇرىق-قازىنا" ۇلتتىق كومپانياسىنىڭ ساتىپ الۋ كەزىندەگى جەرگىلىكتى ۇلەستى ارتتىرۋعا باعىتتالعان تاسىلدەرىنە، سونداي-اق وتاندىق تاۋار وندىرۋشىلەردى قورعاۋ شارالارىنا قولداۋ ءبىلدىردى. ۇلتتىق ءال-اۋقات قورىن باسقارۋ جونىندەگى كەڭەستىڭ ءتوراعاسى پاندەميا جاعدايىندا ۇكىمەت ۇلتتىق ەكونوميكانى قولداۋ ءۇشىن بارلىق تەتىكتەردى بەلسەندى ءارى ءتيىمدى پايدالانىپ جاتقانىن اتاپ ءوتتى" دەلىنگەن رەسمي سايت حابارلاماسىندا.
سونىمەن قاتار كەڭەس بارىسىندا "قازمۇنايگاز" ۇلتتىق كومپانياسى" اكسيونەرلىك قوعامى مەن "قازاقتەلەكوم" اكسيونەرلىك قوعامى باسشىلارىنىڭ ەسەبى تىڭدالدى.
جيىن قورىتىندىسى بويىنشا ۇلتتىق ءال-اۋقات قورىن باسقارۋ جونىندەگى كەڭەستىڭ ءتوراعاسى ءبىرقاتار ناقتى تاپسىرما بەردى.
