پاۆلودار وبلىسىندا 25 جاستاعى دارىگەر جول اپاتىنان كوز جۇمدى. بۇل تۋرالى ءوڭىردىڭ پوليسيا دەپارتامەنتى حابارلادى.

قايعىلى وقيعا 6 تامىز كۇنى ساعات 23:45 شاماسىندا ومبى-مايقاپشاعاي اۆتوجولىنىڭ 380ء-شى شاقىرىمىندا بولعان. چەرنوياركا اۋىلىنىڭ ماڭىندا 32 جاستاعى "Nissan Patrol" اۆتوكولىگىنىڭ جۇرگىزۋشىسى "ۋاز" اۆتوكولىگىمەن سوقتىعىسادى. سالدارىنان "ۋاز" اۆتوكولىگىنىڭ 25 جاستاعى جولاۋشى تراسساعا قاراي ۇشىپ كەتىپ، قاراما-قارسى بەتتەگى كولىكتىڭ استىنا ءتۇسىپ، وقيعا ورنىندا قايتىس بولعان. 

سونىمەن قوسا جول اپاتىنان 51 جاستاعى "ۋاز" اۆتوكولىگىنىڭ جۇرگىزۋشىسى، 32 جاستاعى "Nissan Patrol" كولىگىنىڭ جۇرگىزۋشىسى، 30 جاستاعى جولاۋشى مەن 3 جاسار بالا زارداپ شەككەن. ولاردىڭ بارلىعى اۋىر جاراقاتپەن، اۋرۋحاناعا جەتكىزىلگەن. 

پوليسيانىڭ حابارلاۋىنشا،  قايتىس بولعان 25 جاستاعى دارىگەر، ناۋقاس ايەلدى اقسۋ قالالىق اۋرۋحاناعا جاتقىزىپ، اۋىلدىق امبۋلاتورياعا قايتىپ كەلە جاتىپ، جول اپاتىنا ۇشىراعان. مارقۇمنىڭ  ارتىندا جۇكتى ايەلى مەن جاس بالاسى قالدى.